BAKI, AzerVoice
Türkiyənin Daxili İşlər naziri Ali Yerlikaya Adana mərkəzli 7 əyalətdə keçirilən genişmiqyaslı narkotik əməliyyatı nəticəsində 825 kiloqram heroinin ələ keçirildiyini və 30 şübhəlinin saxlanıldığını açıqlayıb.
AzerVoice xəbər verir ki, nazir Yerlikaya sosial media hesabında yaydığı məlumatda bildirib ki, əməliyyatlar Adana Baş Prokurorluğu və Emniyyət Baş İdarəsinin Narkotiklərlə Mübarizə İdarəsinin koordinasiyası ilə həyata keçirilib. Əməliyyatlara Adana Əyalət Təhlükəsizlik İdarəsinin xüsusi qrupları rəhbərlik edib.
Əməliyyatlar Adana, Hakkari, Hatay, İstanbul, Van, Diyarbəkir və Mersin əyalətlərində təşkil olunub.
Ali Yerlikaya qeyd edib ki, cinayətkar qruplaşmanın başçısı olan Ş.İ. hazırda xaricdə gizlənir. Onun idarə etdiyi beynəlxalq narkotik təşkilatına qarşı keçirilən əməliyyat çərçivəsində 38 ayrı ünvana eyni vaxtda basqın təşkil olunub.
“Bu əməliyyatlarla 825 kiloqram heroin müsadirə etdik. Zəhər tacirliyində ittiham olunan 30 nəfər şübhəli saxlanılıb. Bundan əlavə, qanunsuz odlu silahlar və çoxlu sayda rəqəmsal materiallar da ələ keçirilib,” – deyə nazir bildirib.
