BAKI, AzerVoice
Türkiyədə bir həftədən çoxdur davam edən meşə yanğınları xüsusilə İzmir, Bilecik və Hatay vilayətlərində yaşayış məntəqələrini təhdid edir.
AzerVoice xəbər verir ki, Türkiyənin daxili işlər naziri Ali Yerlikaya məsələ ilə bağlı açıqlama verərək, 50 mindən çox vətəndaşın müvəqqəti olaraq təhlükəsiz bölgələrə təxliyə edildiyini bildirib.
Nazirin sözlərinə görə, İzmirin Menderes və Seferihisar, həmçinin Bilecik və Hatay başda olmaqla bir çox ərazidə yanğınlara qarşı operativ müdaxilələr davam edir.
İlkin qiymətləndirmələrə əsasən, Bilecikdə 64 ev, 3 iş yeri və 20 tövlə, İzmirin müxtəlif bölgələrində isə 132 ev və 1 iş yeri yanğın nəticəsində zərər görüb.
Nazir Yerlikaya açıqlamasında həmçinin qeyd edib ki, Fövqəladə Halların İdarə Olunması Agentliyi (AFAD) tərəfindən Bilecik və İzmir valiliklərinə hərəsinə 30 milyon TL olmaqla ümumilikdə 60 milyon TL təcili yardım vəsaiti göndərilib.
“Yanğından zərər çəkən vətəndaşlarımıza keçmiş olsun deyirik. Dövlətimiz bütün qurumları ilə onların yanındadır,” – deyə nazir vurğulayıb.
Türkiyə hökuməti baş verən meşə yanğınlarına qarşı hava və quru qüvvələrinin iştirakı ilə genişmiqyaslı mübarizəni davam etdirir.
