BAKI, AzerVoice
Türkiyənin Bilecik vilayətində baş verən yanğınlar nəticəsində 47 obyekt sıradan çıxıb.
AzerVoice xəbər verir ki, bu barədə Türkiyənin Ətraf Mühit, Şəhərsalma və İqlim Dəyişikliyi naziri Murat Kurum məlumat verib.
Məlumata görə, Bilecikin Gölpazarı və Osmaneli rayonlarında baş vermiş yanğınlar nəticəsində 23-ü yaşayış evi və biri məscid olmaqla, ümumilikdə 47 müstəqil obyekt tamamilə yanaraq sıradan çıxıb.
Nazir əlavə edib ki, 41 evlə yanaşı, 25 tövlə və anbar kimi obyektlər də ağır ziyan görüb.
Kənd və məhəllələrin təxliyə olunduğu bildirilərkən, kənd təsərrüfatına və yaşayış sahələrinə ciddi zərər dəydiyi vurğulanıb.
Kənd Təsərrüfatı və Meşə Təsərrüfatı naziri İbrahim Yumaklı isə bildirib ki, hüquq-mühafizə orqanları yanğınlarla bağlı araşdırmalar aparmağa davam edirlər.
"Baş verən yanğınlarla əlaqədar hüquq-mühafizə orqanlarımız çox diqqətli şəkildə araşdırmalar aparıb. Biz də bu yanğınlara səbəb olanların ən ağır şəkildə cəzalandırılması üçün prosesi yaxından izləyəcəyik" - deyə, o bildirib.
Nazir həmçinin qeyd edib ki, son iki gün ərzində ölkədə 150 meşə yanğını baş verib və 16 yaşayış məntəqəsi ehtiyat tədbiri olaraq təxliyə olunub. Yanğınların bir hissəsi hələ də davam edir, lakin bir çoxu artıq nəzarət altına alınıb. Sakaryadan Bilecikə keçən alovun geniş yayılmasının qarşısının alınması üçün müdaxilələr davam etdirilir.
