BAKI, AzerVoice

İran nəqliyyat baxımından mərkəzi mövqedədir, atəşkəs iqtisadi təhlükəsizlik üçün önəmlidir.

AzerVoice xəbər verir ki, Türkiyənin ticarət naziri Ömər Bolat “Əsri Ticarət Zirvəsi”ndə çıxışı zamanı İsrail-İran gərginliyi və bölgədəki hərbi toqquşmaların regional ticarətə və nəqliyyata yaratdığı risklərə toxunub.

O bildirib ki, İran Orta Asiya və Orta Dəhlizə aparan yolun düz mərkəzində yerləşdiyi üçün nəqliyyat baxımından ciddi risk elementi yaradırdı.

“Atəşkəsin əldə olunması Türkiyə üçün müsbət haldır. Biz müharibələri dəstəkləmirik. İranla sərhədimiz 400 ildir sülhün simvoludur. İsrailin İrana hücumları və bombardmanı bizim qınadığımız bir vəziyyətdir. İran da güclü müqavimət göstərdi. Nəhayət, 12 gündən sonra atəşkəs əldə olundu və biz də buna görə məmnunuq”, – deyə Bolat bildirib.

Nazir əlavə edib ki, İran dünya neftinin 25 faizinin keçdiyi Hörmüz boğazında yerləşən strateji ölkədir və bu səbəbdən hərbi gərginlik neft və əmtəə bazarlarında kəskin dalğalanmalara səbəb olub: “İsrailin təbii qaz obyektlərinə hücumu ilə iyunun 13-də neft qiymətləri 15-20 faiz civarında artdı”.

O qeyd edib ki, ötən il İrandan Türkiyəyə 3,3 milyon turist gəlib, bu ilin ilk 5 ayında isə bu rəqəm artıq 1 milyonu keçib. İranla ümumi ticarət dövriyyəsi 7,8 milyard dollara yaxındır. Türkiyənin bu ölkəyə ixracı 3,25 milyard, idxalı isə – əsasən təbii qaz olmaqla – 4,55 milyard dollar civarındadır. Hazırda təbii qaz tədarükündə fasilə olmasa da, müharibə riski ticarətə mənfi təsir göstərmək potensialına malikdir.

“Atəşkəs qalıcı olarsa, bu mənfi təsirlər minimum səviyyədə qalar”, – deyə Bolat vurğulayıb.

Nazir həmçinin bölgədəki digər münaqişələr – Rusiya-Ukrayna müharibəsi, Suriya və Qəzza böhranları fonunda Türkiyənin 780 min kvadrat kilometrlik ərazisində sülh və sabitliyi qoruduğunu bildirib. O, Türkiyə iqtisadiyyatının son 20 ildə böyük inkişaf yolu keçdiyini, milli gəlirin 238 milyard dollardan 1 trilyon 371 milyard dollara çatdığını, adambaşına düşən milli gəlirin isə 3600 dollardan 15 971 dollara yüksəldiyini vurğulayıb.

Qeyd edək ki, Dünya Bankı son hesabatında Türkiyəni “yüksək gəlirli ölkələr” kateqoriyasına daxil edib.