BAKI, AzerVoice
Tramp İsrailə xəbərdarlıq edib - O bombaları İrana atma!
AzerVoice xəbər verir ki, ABŞ
prezidenti Donald Tramp İsrail və İran arasında elan edilən
atəşkəsə baxmayaraq hücumların davam etməsinə sərt reaksiya
verib.
O, sosial media hesabında İsrailə çağırış edərək , “İsrail, o
bombaları (İrana) atma. Əgər atsan, bu, böyük pozuntu olar. Dərhal
pilotlarınızı geri çağırın” - deyə bildirib.
Tramp NATO-nun Haaqada keçiriləcək sammitinə yola düşməzdən
əvvəl Ağ Evdə jurnalistlərin suallarını cavablandırarkən, İran və
İsrailin atəşkəsi pozduğunu bildirib.
“İsraildən məmnun deyiləm. Hər iki tərəf atəşkəsi pozub. O qədər
şiddətli döyüşürlər ki, artıq nə etdiklərini bilmirlər”- deyə o
əlavə edib.
Xatırladaq ki, Tramp daha əvvəl gecə saatlarında İsrail və İran arasında atəşkəs əldə olunduğunu açıqlamış və saat 07:00-dan qüvvəyə minəcəyini bildirmişdi. Lakin İsrail tərəfi atəşkəsin qüvvəyə minməsindən sonra İrandan raketlər atıldığını iddia etmiş, müdafiə naziri isə buna cavab olaraq hücum əmri verdiyini açıqlamışdı.
İran Silahlı Qüvvələrinin Baş Qərargahı isə raketlərin öz ərazilərindən atıldığı iddiasını təkzib edib.