BAKI,AzerVoice
İranın suverenliyinə və bölgəmizin təhlükəsizliyinə yönəlmiş hücumları kim tərəfindən gəlirsə gəlsin əsla təsdiqləmirik və mövqeyimizi açıq şəkildə ortaya qoyuruq.
AzerVoice xəbər verir ki, Türkiyə Prezidenti Rəcəb Tayyib Ərdoğan, İsrail və onun müttəfiqlərinin İrana qarşı hərbi hücumlarına münasibət bildirib.
Prezident Ərdoğan çıxışında bölgədəki gərginliklərə və Türkiyənin diplomatik mövqeyinə də toxunub.
O bildirib ki, Türkiyə bir tərəfdən 6 fevral zəlzələsinin yaralarını sarmaq üçün çalışır, digər tərəfdən isə regiondakı münaqişə və böhranları sabitlik yolu ilə idarə etməyə səy göstərir.
“3,5 ildir davam edən Rusiya–Ukrayna müharibəsinin ölkəmizə yayılmasına imkan vermədik. 7 oktyabr 2023-dən bəri davam edən Qəzza soyqırımında isə İsrailə qarşı ən açıq və qəti mövqe sərgiləyən ölkələrdən biri olduq. Soyqırımçı İsraillə bütün ticarət əməliyyatlarını dayandıraraq ümumilikdə 9 milyard dollar məbləğindən imtina etdik”- deyə o bildirib.
Ərdoğan çıxışının sonunda İsrail və onun tərəfdarlarının İrana qarşı son hücumlarına toxunaraq bu hücumların bölgədə daha genişmiqyaslı bir fəlakətə çevrilməsinin qarşısını almaq üçün ciddi səylər göstərdiklərini bildirib.
“İranın suverenliyinə və bölgənin təhlükəsizliyinə yönəlmiş hücumları istər ABŞ-dən, istər İsraildən, istərsə də hər hansı başqa qüvvədən gəlsin, qəbul etməyəcəyik və reaksiyamızı açıq şəkildə ortaya qoymağa davam edəcəyik”- deyə Ərdoğan vurğulayıb.
