BAKI, AzerVoice

Azərbaycan Məhəlləsində həyat başlayır- Kahramanmaraşda "Güclü Sabaha Birlikdə" mərasimi keçiriləcək.

AzerVoice xəbər verir ki, iyunun 19-da Kahramanmaraşda Azərbaycan hökuməti və Türkiyənin TOKİ qurumunun əməkdaşlığı ilə inşa edilən “Azərbaycan Məhəlləsi”ndə “250.000-ci Fəlakət Evinin Açar Təslimi və Püşkatma Mərasimi” keçiriləcək.

Ətraf Mühit, Şəhərsalma və İqlim Dəyişikliyi naziri Murat Kurum mərasimdən öncə sosial şəbəkədə Azərbaycan Məhəlləsi və Ebrar Saytından görüntülər paylaşaraq, “Çətin dünənlərdən xoşbəxt bu günlərə və Güclü Sabah üçün Birlikdə. Bu hekayənin adı Kahramanmaraş”- deyə bildirib.

Paylaşılan videoda 1183-ü yaşayış, 1595-i iş yeri olmaqla ümumilikdə 2778 müstəqil bölmənin yer aldığı Azərbaycan Məhəlləsi əks olunub. Həmçinin, məhəllədə fəaliyyət göstərən Heydər Əliyev adına ibtidai məktəbdə oxuyan şagirdlərin görüntüləri də təqdim edilib.

Qeyd edək ki, Azərbaycan Məhəlləsi 2023-cü ilin fevralında baş vermiş Kahramanmaraş zəlzələsindən sonra qardaş ölkəyə dəstək olaraq sürətlə inşa edilən simvolik yaşayış məntəqələrindən biridir.