BAKI, AzerVoice
13 əyalət sürətli dəmir yolu şəbəkəsinə qoşulacaq – 8 milyon daha insan faydalanacaq.
AzerVoice xəbər verir ki, Türkiyə
Nəqliyyat və İnfrastruktur naziri Abdulkadir Uraloğlu ölkənin
şimalı ilə cənubunu birləşdirən sürətli və ekoloji dəmir yolu
şəbəkəsinin yaradıldığını açıqlayıb.
Nazir bildirib ki, Ankara-Kırıkkale-Çorum-Samsun marşrutu üzrə
sürətli dəmir yolu layihəsi ilə yanaşı, Samsun-Sarp və digər
istiqamətlər üzrə inteqrasiya nəticəsində əlavə 8 milyon insan
sürətli qatarlardan istifadə edə biləcək.
Uraloğlu şənbə günü 120 kilometrlik Delice-Çorum xəttinin təməlqoyma mərasiminin keçiriləcəyini vurğulayıb. Bu layihənin ölkənin şimalı ilə cənubunu birləşdirən strateji dəmir yolu dəhlizində mühüm bağlantı yaradacağını bildirib. Qeyd olunub ki, layihə çərçivəsində 26 körpü, 8 tunel, 100-dən çox yerüstü və yeraltı keçid inşa ediləcək.
Delice-Çorum hissəsi tamamlandıqdan sonra Çorum-Merzifon-Samsun xətti ilə birlikdə Ankara-Samsun arasında səyahət müddəti 2,5 saata enəcək. Uraloğlu bu marşrut üzrə ildə 12 milyon sərnişin və 14 milyon ton yük daşınacağını qeyd edib.
Qeyd edək ki, yeni dəmir yolu şəbəkəsinə Artvin, Rize, Trabzon, Giresun, Ordu, Samsun, Amasya, Çorum, Kırşehir, Aksaray, Niğde və Mersin daxil ediləcək. Beləliklə, Qara dəniz və Aralıq dənizi limanları yüksək sürətli dəmir yolu vasitəsilə birləşdiriləcək.
