BAKI, AzerVoice

Qırmızı bülletenlə axtarılan 7 şəxs Türkiyəyə gətirilib.

AzerVoice xəbər verir ki, Türkiyənin daxili işlər naziri Ali Yerlikaya sosial media hesabında paylaşım edərək, qırmızı bülleten və beynəlxalq yayılma mesajı ilə axtarılan 7 nəfərin tutulub Türkiyəyə gətirildiyini açıqlayıb.

Nazir bildirib ki, Ədliyyə Nazirliyi, Təhlükəsizlik Baş İdarəsinin INTERPOL–EUROPOL Şöbəsi, Kəşfiyyat, KOM və Narkotiklərlə Mübarizə İdarələrinin koordinasiyalı fəaliyyəti nəticəsində Almaniya, Şimali Makedoniya, Hollandiya, Fransa, Rusiya və Gürcüstanda saxlanılan şəxslər Türkiyəyə təhvil verilib.

Əməliyyatlar İstanbul, Antalya və Artvin polis idarələri, həmçinin Antalya Jandarma Komandanlığı tərəfindən həyata keçirilib.

Saxlanılan şəxslər barəsində müxtəlif ağır cinayət ittihamları mövcuddur. Onlar arasında dələduzluq, narkotik maddələrin qanunsuz dövriyyəsi, adam öldürmə, təşkilata üzvlük, uşağa qarşı cinsi istismar və digər ittihamlarla axtarışda olan şəxslər var.

Nazir Yerlikaya qeyd edib ki, cari hökumət dövründə 360 nəfərin saxlanılması təmin olunub və cinayətkarlara qarşı mübarizə qətiyyətlə davam etdiriləcək. O, əməliyyatda iştirak edən bütün qurumlara və əməkdaşlara təşəkkür edib.