BAKI, AzerVoice

Türk Dövlətləri Təşkilatı qlobal sabitliyə töhfə verir.

AzerVoice xəbər verir ki, Prezident Rəcəb Tayyib Ərdoğan Macarıstan səfəri dönüşündə təyyarədə jurnalistlərin suallarını cavablandırıb.

O, Türk Dövlətləri Təşkilatının Budapeştdə keçirilən qeyri-rəsmi zirvə toplantısını yüksək qiymətləndirib və təşkilatın beynəlxalq nüfuzunun artdığını bildirib.

“Budapeştdə keçirilən bu sammit təşkilatımızın bir müşahidəçi üzv dövlətdə və Avropa İttifaqı ərazisində təşkil olunan ilk sammiti oldu. Bu, Türk Dövlətləri Təşkilatının qlobal miqyasda artan əhəmiyyətinin göstəricisidir,” – deyə Prezident qeyd edib.

Ərdoğanın sözlərinə görə, təşkilatın qərarları yalnız siyasi sahədə deyil, iqtisadi əlaqələrə də töhfə verir. Son beş ildə Türkiyənin təşkilatın dörd üzv dövləti ilə ticarət həcminin 50 faizə yaxın artaraq 80 milyard dollara çatdığını vurğulayıb.

Prezident Ərdoğan bildirib ki, Budapeşt Zirvəsində qəbul edilən sənədlər arasında Kipr Türklərinin hüquqlarının müdafiəsinə və adadakı həll yollarına dair bəyannamələr də var. “Şimali Kipr Türk Respublikasının Türk dünyasına verdiyi töhfələri yüksək qiymətləndiririk. Kipr Türklərinin təbii hüquqlarının təmin olunması vacibdir.” - deyə o bildirib.

Ərdoğan qeyd edib ki, növbəti – 12-ci zirvə 2025-ci ilin oktyabrında Azərbaycanda keçiriləcək və bu tədbirə hazırlıq artıq başlayıb. Eyni zamanda Qəzza, Fələstin, Suriya və Əfqanıstanla bağlı məsələlərə diqqət yetirildiyini, Novruz bayramı ilə əlaqədar ortaq tədbirlərin təşkilinə dair razılığın əldə olunduğunu bildirib.

Zirvə çərçivəsində həmçinin Nobel mükafatı laureatı Prof. Dr. Aziz Sancara Türk dünyasına verdiyi töhfələrə görə Əlişir Nəvai mükafatı təqdim edilib.

Macarıstanla ikitərəfli əlaqələrə toxunan Prezident, bu ölkənin həm Türk Dövlətləri Təşkilatının müşahidəçi üzvü, həm də Avropa İttifaqının üzvü kimi xüsusi mövqeyə sahib olduğunu vurğulayaraq, Macarıstanın Türkiyənin Aİ-yə üzvlük prosesinə verdiyi dəstəyi də qeyd edib.

Qeyd edək ki, Prezident Rəcəb Tayyib Ərdoğan son olaraq 2025-ci il mayın 21-də Macarıstanın paytaxtı Budapeştə səfər edib. Bu səfər çərçivəsində o, Türk Dövlətləri Təşkilatının Dövlət Başçıları Şurasının qeyri-rəsmi iclasında iştirak edib.