BAKI,AzerVoice

Türkiyədə ilk dəfə “musiqili yol” istifadəyə verilib.

AzerVoice xəbər verir ki, Türkiyədə avtomobil yollarında ilk “musiqili yol” tətbiqi Ankaranın Nallıhan-Beypazarı Dövlət Yolunun 21-ci kilometrində reallaşdırılıb.

Bu barədə Nəqliyyat və İnfrastruktur Naziri Abdulkadir Uraloğlu məlumat verib.

Nazir bildirib ki, Karayolları Ümumi Müdirliyinin həyata keçirdiyi layihə çərçivəsində yol səthinə xüsusi işarələr yerləşdirilib. Avtomobillər müəyyən sabit sürətlə bu zolaqlardan keçərkən, təkərlərin yaratdığı vibrasiya və səs dalğaları nəticəsində musiqi melodiyası eşidilir.

Uraloğlu bildirib ki, Nallıhan rayonunun Eymir kəndi yaxınlığında aparılan bu texniki yeniliyin sınaq mərhələsi artıq tamamlanıb. Sürücülər 100 km/saat sabit sürətlə hərəkət etdikdə Motsartın məşhur “Türk Marşı” melodiyası aydın şəkildə eşidilir. Tətbiq, həmçinin Davutoğlan Vəhşi Təbiət İnkişafı Bölgəsinə zərər verməyəcək məsafədə yerləşdirilib.

Qeyd edək ki, bu innovativ yol texnologiyası dünyada bir sıra ölkələrdə də sınaqdan keçirilib. Lakin səslə bağlı narahatlıqlar səbəbilə tətbiq adətən yaşayış məntəqələrindən uzaq ərazilərdə həyata keçirilir.

Nazir Uraloğlu əlavə edib ki, ikinci melodik yol xətti Ankara–Əskişəhər Dövlət Yolunun 37-ci kilometrində, Sivrihisar çıxışında inşa edilir. Yolun melodiyanı aydın verə bilməsi üçün düz və səssiz asfalt üzərində olması, nəqliyyat vasitələrinin sabit sürətlə hərəkət etməsi əsas texniki şərtlərdəndir.