BAKI, AzerVoice

“Sülh yolunda irəliləmək üçün bu fürsətdən istifadə etməliyik.”

AzerVoice xəbər verir ki, Türkiyənin xarici işlər naziri Hakan Fidan İstanbulda keçirilən Türkiyə-Rusiya-Ukrayna Üçtərəfli Toplantısında sülh təşəbbüsləri ilə bağlı mühüm açıqlamalar verib.

O, Dolmabahçe Rəyasət Heyətində danışıqların açılışında çıxış edərək bildirib ki, sülh yolunda irəliləmək üçün yaranmış fürsətdən istifadə edilməlidir. “Gecikmənin hər günü daha çox insanın həyatını itirməsinə səbəb olur”- deyə o qeyd edib.

Bildirək ki, bu görüş Rusiya və Ukrayna nümayəndələri arasında 2022-ci ilin martından bəri ilk birbaşa təmasdır. Fidan danışıqların başlanmasını tərəflərin iradəsinin göstəricisi kimi dəyərləndirib və bildirib ki, hazırkı mərhələdə iki yol var. “Biri sülhə aparır, digəri isə daha çox dağıntı və insan itkisinə. Bu yolda hansı istiqaməti seçəcəklərinə özləri qərar verəcəklər”- deyə o bildirib.

Nazir Fidan həmçinin Türkiyə prezidenti Rəcəb Tayyib Ərdoğanın, Rusiya prezidenti Vladimir Putinin, Ukrayna prezidenti Volodimir Zelenskinin və ABŞ prezidenti Donald Trampın sülh çağırışlarına diqqət yetirməsinin əhəmiyyətini vurğulayıb. O, Zelenskinin Ankaraya səfərinin də danışıqların başlanması baxımından mühüm addım olduğunu qeyd edib.

Rusiya nümayəndə heyətinin qəbul edilməsinin də Türkiyənin münaqişənin həlli üçün göstərdiyi qətiyyətli iradənin göstəricisi olduğunu bildirən Fidan, danışıqlarla paralel olaraq atəşkəsin də həyata keçirilməsinin vacibliyinə diqqət çəkib. “Etməli olduğumuz seçimlər və atacağımız addımlar növbəti mərhələni müəyyən edəcək” - deyə o vurğulayıb.

Nazir həmçinin bu danışıqların dövlət başçıları səviyyəsində keçirilməsi mümkün olan liderlər görüşünün əsasını təşkil edə biləcəyini bildirib. “Danışıqlar yolu ilə sülhə nail olmağın mümkün olduğuna ürəkdən inanırıq. Türkiyə bu səylərdə tərəflərlə birlikdə olmağa davam edəcək və sülh prosesinə töhfə verməyə hazırdır” - deyə o sonda bildirib.

Qeyd edək ki, İstanbulda baş tutan görüşdə Türkiyə, Rusiya və Ukrayna nümayəndə heyətləri xarici işlər naziri Hakan Fidanın sədrliyi ilə iştirak edib. Türkiyə nümayəndə heyətinə Milli Kəşfiyyat Təşkilatının rəhbəri İbrahim Kalın da daxildir. Rusiya nümayəndə heyətinə prezident Vladimir Putinin müşaviri Vladimir Medinski rəhbərlik edib. Heyətdə həmçinin Rusiya xarici işlər nazirinin müavini Mixail Qaluzin, Baş Qərargahın Baş Kəşfiyyat İdarəsinin direktoru İqor Kostyukov, müdafiə nazirinin müavini Aleksandr Fomin və digər rəsmilər iştirak ediblər. Ukrayna tərəfini isə müdafiə naziri Rüstəm Umerov başçılıq edib. Onunla birlikdə xarici işlər nazirinin müavini Sergiy Kislytsya, Təhlükəsizlik Xidməti rəhbərinin müavini Aleksandr Poklad və digər rəsmilər də danışıqlarda iştirak ediblər.