BAKI, AzerVoice, Fərid Mikayılov

ABŞ-ın 2003-cü ildə İraqın işğalından sonra ilk dəfə olaraq Yaxın Şərq regionuna ən böyük hava qüvvəsini yerləşdirdiyi iddia olunur.

AzerVoice xəbər verir ki, bu barədə “The Wall Street Journal” nəşri məlumat verib.

Vaşinqton son günlər regionda hava və dəniz hərbi kontingentini gücləndirərək İrana qarşı mümkün əməliyyat variantlarını nəzərdən keçirir.

Məlumatda bildirilir ki, nəzərdən keçirilən ssenarilər iyun 2025-ci ildə İranın nüvə obyektlərinə qarşı həyata keçirilən “birdəfəlik zərbə” variantından fərqli olaraq, həftələrlə davam edə biləcək genişmiqyaslı hava əməliyyatını da əhatə edir. Donald Trampa təqdim olunan brifinqlərin İran rəhbərliyinə və regional müttəfiqlərinə maksimum zərər vurmaq məqsədi daşıdığı vurğulanır.

Seçimlər arasında İranın siyasi və hərbi liderliyini hədəfə almaq, eləcə də nüvə və ballistik raket infrastrukturlarına zərbələr endirmək variantları yer alır.

Nəşr qeyd edir ki, Tramp administrasiyası İranın nüvə proqramının ləğvini, regional təsir şəbəkəsinin zəiflədilməsini və ballistik raketlərin məhvini nəzərdə tutan razılaşma əldə etməyə çalışır. Lakin İran tərəfi xüsusilə raket arsenalını əsas çəkindirici vasitə kimi qiymətləndirir və bu istiqamətdə güzəştə getməyə meyilli görünmür.

1991-ci ildə İraqa qarşı əməliyyatda iştirak etmiş ABŞ Hərbi Hava Qüvvələrinin istefada olan generalı Devid Deptula gücləndirməni “əhəmiyyətli və dramatik artım” kimi qiymətləndirib. Onun sözlərinə görə, bu addım İran rəhbərliyini razılaşmaya sövq edə bilər.

Hazırda regionda “USS Abraham Lincoln” təyyarədaşıyan gəmisi və ballistik raketlərə qarşı müdafiə qabiliyyətinə malik 9 esmines yerləşdirilib. “USS Gerald R. Ford” təyyarədaşıyan gəmisi və əlavə dörd esmines isə bölgəyə doğru hərəkət edir.