BAKI, AzerVoice

Ümit Özdağın prezidentə təhqir iddiası üzrə məhkəmə sentyabra təxirə salınıb.

AzerVoice xəbər verir ki, Türkiyədə Zəfər Partiyasının sədri Ümit Özdağın Prezident Rəcəb Tayyib Ərdoğanı təhqir etdiyinə dair ittihamla barəsində başlanan cinayət işi üzrə ilk məhkəmə iclası keçirilib.

İstanbul 35-ci Cəza Məhkəməsində keçirilən iclasda Özdağ və onun vəkilləri iştirak edib. Məhkəmə prosesinin davamı 10 sentyabr 2025-ci il tarixinə təxirə salınıb.

Özdağ yanvarın 19-da Antalyada keçirilən partiyasının müşavirə toplantısında prezidentin ünvanına səsləndirdiyi fikirlərə görə hakim qarşısına çıxıb. Müdafiəsində o, sözlərinin siyasi tənqid çərçivəsində olduğunu və heç bir halda təhqir niyyəti daşımadığını bildirib.

Qeyd edək ki, iclas zamanı SEGBİS (AUDİO VİDEO İNFORMASİYA SİSTEMİ) sistemində yaranan texniki nasazlıq səbəbilə fasilə verilib. Bu zaman CHP lideri Özgür Özəl Ümit Özdağın yanına gedərək onunla görüşüb və iclası tərk edib. Məhkəmə iclasında CHP və Müstəqil Türkiyə Partiyasının rəhbərləri də daxil olmaqla, bir sıra müxalifət nümayəndələri iştirak ediblər.

Özdağ çıxışında fikirlərinin AKP sədrinə qarşı yönəldiyini vurğulayaraq, "Bu bir siyasi polemikadır və prezident kimliyinə yönəlməyib" - deyə qeyd edib. Müdafiədən sonra vəkillərin çıxışları dinlənilib və məhkəmə iclası təxirə salınıb.