BAKI, AzerVoice

Türkiyə Üç Dəniz Təşəbbüsünə strateji tərəfdaş kimi qoşulur.

AzerVoice xəbər verir ki, Polşa Prezidenti Anjey Duda Varşavada keçirilən Üç Dəniz Təşəbbüsünün 10-cu sammitində Türkiyə və İspaniyanın təşəbbüsə strateji tərəfdaş kimi qoşulduğunu rəsmən elan edib.

Mərkəzi və Şərqi Avropada enerji, nəqliyyat və rəqəmsallaşma sahələrində infrastrukturun inkişafına yönələn Üç Dəniz Təşəbbüsünün builki sammiti geosiyasi vəziyyət və Ukrayna-Rusiya müharibəsinin davam etdiyi bir zamanda keçirilib. Polşa lideri yeni tərəfdaşların təşəbbüsə töhfə verəcəyinə inandığını bildirib.

Sammitin əsas plenar iclası bu gün Varşavadakı Kral Qalasında keçirilir. Toplantıda 12-si prezident səviyyəsində olmaqla 23 nümayəndə heyəti iştirak edir. Türkiyəni tədbirdə nəqliyyat və infrastruktur naziri Abdulkadir Uraloğlu təmsil edir. ABŞ, Yaponiya, ərəb ölkələri və Avropa Komissiyası da tədbirdə təmsil olunan strateji tərəfdaşlar sırasındadır.

Qeyd edək ki, Üç Dəniz Təşəbbüsü 2015-ci ildə Polşa və Xorvatiya tərəfindən irəli sürülüb. Əsas məqsəd Baltik, Adriatik və Qara dənizlər arasında yerləşən 12 Aİ üzv ölkəsinin şimal-cənub oxunda inteqrasiyasını gücləndirməkdir. 2023-cü ildə təşəbbüs Yunanıstanı da əhatə etməyə başlayıb.

Təşəbbüs çərçivəsində 143 prioritet infrastruktur layihəsi müəyyən olunub. Bunlar arasında Türkiyənin iştirak etdiyi mühüm layihələrdən biri – Via Carpatia magistral yolu – Litvanın Klaypeda limanından başlayaraq Polşa, Slovakiya, Macarıstan, Rumıniya və Bolqarıstandan keçməklə Saloniki və İstanbuladək uzanır.

Bildirilib ki, Türkiyənin təşəbbüsə daha aktiv cəlb olunması Qara dəniz hövzəsinin müdafiəsinə və regionun iqtisadi inkişafına mühüm töhfə verəcək. Mərkəzi və Şərqi Avropada infrastrukturun yenilənməsi üçün 2030-cu ilədək nəqliyyatda 290 milyard avro, enerjidə 88 milyard avro və telekommunikasiyada 160 milyard avro sərmayəyə ehtiyac olduğu vurğulanıb.