BAKI,AzerVoice

Suriya Prezidenti Əhməd əş-Şaraa Yeni ilin gəlişi münasibətilə Suriya xalqını təbrik edərək, ölkənin gələcəyinə nikbin baxdığını bildirib.

AzerVoice xəbər verir ki, Suriya prezidenti Əş-Şaraa “X” sosial platformasında paylaşdığı mesajda qeyd edib ki, yeni ilin başlanğıcı Suriyanın vahid, güclü və sabit dövlət kimi inkişafına ümid yaradır.

“Yeni ilin başlanğıcı ilə böyük ümid və nikbinliklə parlaq gələcəyə baxırıq. Bu gələcəkdə Suriya vahid, güclü və sabit qalacaq, suriyalılar isə əl-ələ verərək ölkənin quruculuğunda və inkişafında iştirak edəcəklər. Qoy ölkənin hər guşəsində xeyir, sülh və harmoniya hökm sürsün,” – deyə Əş-Şaraa vurğulayıb.

O, paylaşımını “Hər birinizə və Suriyaya yeni ildə bol xeyir və rifah arzulayıram” sözləri ilə yekunlaşdırıb.

Xristian icması: Xarici “himayə”yə ehtiyac yoxdur

İsrailin baş naziri Beniyamin Netanyahunun Suriyadakı xristian və druz icmalarının “qorunması” ilə bağlı bəyanatlarına cavab olaraq, Antioxiya və Bütün Şərq Rum Pravoslav Kilsəsinin patriarxı İohann X Yəzici bildirib ki, Suriyadakı xristianların xarici müdafiəyə ehtiyacı yoxdur.

Patriarx vurğulayıb ki, xristianlar Suriya milli kimliyinin ayrılmaz hissəsidir və ölkənin bütün digər vətəndaşları ilə birlikdə Vətənlərini müdafiə etməyə davam edəcəklər.

“Suriyalı xristianlar bu ölkənin əsil və köklü tərkib hissəsidir və heç bir xarici müdaxilə adı altında təqdim olunan ‘qoruma’ya ehtiyac duymurlar,” – deyə Yəzici qeyd edib.

“Şam Şəbəkəsi” xəbər portalının məlumatına görə, Netanyahunun hökumətinin Suriyadakı azlıqları “qorumağa hazır” olduğu barədə təkrarlanan bəyanatları ölkədəki xristian liderlər tərəfindən qəti şəkildə rədd edilir. Onlar bu cür çağırışların Suriya dövlətinin suverenliyinə zidd olduğunu və siyasi məqsədlərlə istifadə edildiyini bildirirlər.

Bu mövqe Suriyadakı xristian icmasının milli dövlətə bağlılığını və azlıqlar mövzusunun daxili və ya xarici siyasi alətə çevrilməsinə qarşı olduğunu bir daha nümayiş etdirir.