BAKI, AzerVoice, Nailə Babazadə
Türkiyənin müdafiə sənayesində aparıcı layihələrdən biri olan ALTAY Döyüş Tankının seriyalı istehsalı Ankaradakı BMC zavodunda rəsmən başlayıb. Tankın istehsalı, Aerokosmik və Aviasiya İxtisaslaşdırılmış Sənaye Zonasında (HAB) inşa olunan müasir istehsal bazasında həyata keçirilir.
AzerVoice xəbər verir ki,tankın seriyalı istehsalını həyata keçirəcək BMC Müdafiə və onun yerli mühərrik sistemini — BATU Güc Qrupunu hazırlayacaq BMC Power eyni məkanda fəaliyyət göstərir. Müəssisə qısa müddətdə inşa olunaraq müasir texnologiyalarla təchiz edilib və istifadəyə verilib.
İstehsalat xəttində yerli sənaye robotlarından və yeni nəsil texnologiyalardan istifadə olunur. Tankın gövdəsinin hazırlanmasından tutmuş son montaja qədər bütün mərhələlərdə intensiv iş aparılır.
İlk tankların təhvil verilməsi rəsmi açılışda baş tutacaq
BMC İdarə Heyətinin sədri Fuat Tosyalı, istehsal prosesi ilə bağlı Anadolu Agentliyinə (AA) məlumat verib. O, tankın istehsalının artıq başladığını və ilk tankların rəsmi açılış mərasimində Türkiyə Silahlı Qüvvələrinə təhvil veriləcəyini bildirib:
"Türkiyənin 100 illik xəyalını gerçəkləşdirmək bizə qismət oldu. Keçən il ramazan ayında təməlini atdığımız bu zavod, çox şükür ki, artıq seriyalı istehsala başlayıb. Qısa müddətdə həm ordumuzun, həm də dost ölkələrin tələbatını ödəyəcək şəkildə istehsala davam edəcəyik."
BATU güc qrupu test mərhələsindədir
Tank üçün hazırlanan BATU Güc Qrupunun hazırda test mərhələsində olduğunu bildirən Tosyalı, bu sistemin tanklarda istifadə olunması üçün 10 min kilometrlik yol testi və digər performans yoxlamalarının aparıldığını qeyd edib. Onun sözlərinə görə, bu günə qədər heç bir texniki problem yaşanmayıb və testlər uğurla davam edir.
Tosyalı bu layihəni "milli məsuliyyət və həyəcan" kimi dəyərləndirərək, Türkiyə Prezident Rəcəb Tayyib Ərdoğanın layihənin hər mərhələsini yaxından izlədiyini və böyük dəstək verdiyini vurğulayıb.
Yeni qurulan bu zavodda yalnız ALTAY tankı deyil, eyni zamanda 8x8 ALTUĞ zirehli döyüş maşını da istehsal olunacaq. Zavod, ətrafında yaradılan sənaye klasteri ilə birlikdə Türkiyənin quru qoşunları üçün əsas müdafiə istehsalat mərkəzinə çevriləcək.