BAKI, AzerVoice, Nailə Babazadə
Türkiyənin Nəqliyyat və İnfrastruktur naziri Abdulkadir Uraloğlu bildirib ki, Türkiyə ilə Gürcüstan arasında illik ticarət dövriyyəsinin 5 milyard dollara çatdırılması üçün qətiyyətlə çalışırlar.
AzerVoice xəbər verir ki, rəsmi səfər çərçivəsində Gürcüstanın paytaxtı Tbilisiyə gələn Uraloğlu, Gürcüstanın İqtisadiyyat və Davamlı İnkişaf naziri Mariam Kvrivişvili ilə görüşüb.
İkitərəfli görüşlərdən sonra Uraloğlu və Kvrivişvili Türkiyə-Gürcüstan Hökumətlərarası Qarışıq İqtisadi Komissiyasının (KEK) 6-cı iclasının açılışında iştirak ediblər.
Naizir Uraloğlu qeyd edib ki, Türkiyə ilə Gürcüstan arasındakı ikitərəfli ticarət dövriyyəsi 3,4 milyard dollar səviyyəsinə çatıb:
Uraloğlu Gürcüstanın Cənubi Qafqazın önəmli ölkələrindən biri olduğunu, tarixi mövqeyi və mədəni zənginlikləri ilə həmişə diqqət çəkdiyini vurğulayıb:
“Qara dənizi Xəzər dənizi ilə birləşdirən strateji mövqeyi, dinamik iqtisadiyyatı və qonaqpərvər insanları ilə Gürcüstan bölgəmizdə sabitliyin və rifahın mühüm iştirakçısıdır. Gürcüstan son illərdə həyata keçirdiyi iqtisadi islahatlar və sərmayədar dostu mühiti ilə ciddi nailiyyətlər əldə edib. Bu uğurlar bizi sevindirir və ortaq gələcəyimiz üçün ümid yaradır.”
Nazir əlavə edib ki, tarixi və mədəni bağlarla yanaşı, vizasız səfər imkanları da iki ölkə arasında əlaqələri daha da möhkəmləndirir “Bu çərçivədə münasibətlərimizi Yüksək Səviyyəli Strateji Tərəfdaşlıq səviyyəsində davam etdiririk. Bu səviyyəyə çatmağımızda hər iki ölkə prezidentlərinin ortaq iradəsi və vizyonu mühüm rol oynayıb.” - deyə qeyd edib.
Uraloğlu həmçinin qeyd edib ki, 16 iyul 2025-ci il tarixində imzalanan Azad Ticarət Sazişi (ATS) üzrə Birgə Komitənin qərarı, ikitərəfli ticarətin Pan-Avropa-Aralıq dənizi bölgəsində yeni qaydalar çərçivəsində problemsiz davam etməsinə imkan yaradacaq.
