Bakı. AzerPress:
Qəzzada soyqırıma qarşı çıxmaqla biz həm də Qərb cəmiyyətinin fundamental dəyərlərini müdafiə edirik.
AzerPress-in məlumatına görə, bu sözləri Türkiyə prezidenti Rəcəb Tayyib Ərdoğan bildirib.
"Türkiyənin oriyentasiyasını və mənsubiyyətini müzakirə etməkdənsə, bəzi Qərb ölkələrinin bəzən güclü şəkildə müdafiə etdikləri dəyərlərə məhəl qoymadıqları şübhə altına alınmalıdır. Qəzzada baş verən vəhşiliklərə susmaq bunun ən bariz nümunəsidir. Əslində, biz Qəzzada baş verən soyqırıma qarşı çıxmaqla Qərb cəmiyyətinin təməl dəyərlərini də müdafiə edirik. Qəzzada insan haqlarının açıq-aşkar məhv edilməsinə səssiz qalmaq, insanların ev və torpaqlarının sistematik şəkildə zəbt edilməsi, mülkiyyət hüququna məhəl qoyulmaması, fələstinlilərin öz müqəddəratını təyinetmə hüququnun əlindən alınması Qərb sivilizasiyasına uyğundur? Xəstəxanaların bombalanması, məktəblərin, qaçqın düşərgələrinin, bazarların atəşə tutulması və mülki şəxslərin öldürülməsi hansı Qərb dəyərlərinə uyğundur?",- deyə Ərdoğan bildirib.
Qeyd edək ki, Qəzza zolağında ölənlərin sayı 16 min 248 nəfərdir.
Xatırladaq ki, oktyabrın 7-də HƏMAS İsrail əleyhinə "Əqsa Tufanı" əməliyyatına başlayıb. Buna cavab olaraq, İsrail Qəzzada hərbi əməliyyatlara başlayıb.
Aytac Süleymanova
Twitter: a_alieva_