BAKI, AzerVoice, Nailə Babazadə

Türkiyə Prezidenti və AK Parti sədri Rəcəb Tayyib Ərdoğan Azərbaycan-Gürcüstan sərhədinə yaxın bölgədə baş vermiş hərbi C-130 təyyarəsi qəzası ilə bağlı məlumat verib.

AzerVoice xəbər verir ki, Ərdoğan, bunu partiyasının Genişləndirilmiş İl Başçılar Toplantısında çıxışı zamanı bildirib.

Ərdoğan qeyd edib ki, qəza nəticəsində 20 türk hərbçisi şəhid olub. O, şəhidlərin adlarını xüsusi hörmətlə yad edib.

Prezident bildirib ki, hadisə Azərbaycan ilə Gürcüstan sərhədinə yaxın Sığnacı bölgəsində baş verib və təyyarə Qarabağ zəfərinin 5-ci ildönümü tədbirləri üçün Azərbaycana gedən birliyi daşıyırmış.

Ərdoğan vurğulayıb ki, qəza xəbərini alar-almaz Türkiyənin Müdafiə, Daxili İşlər və Xarici İşlər nazirlikləri əlaqə saxlayıb və axtarış-xilasetmə işləri dərhal başlanıb. Təyyarənin qara qutusu tapılıb və araşdırmalar davam edir. Hazırda 19 şəhidin cəsədinə çatılıb, sonuncusunun tapılması üçün işlər davam etdirilir.

Prezident həmçinin Azərbaycan Prezidenti İlham Əliyev və Gürcüstan Baş naziri ilə telefon danışığı həyata keçirildiyini və hər iki ölkənin qəza ilə bağlı bütün dəstəyi göstərdiyini bildirib. O vurğulayıb ki, Türkiyə dövlətinin imkanları ilə yanaşı, Azərbaycan və Gürcüstanın resursları da qəzanın nəticələrinin aradan qaldırılması üçün səfərbər edilib.

Ərdoğan xalqdan yalan məlumatlara və dezinformasiyalara qarşı diqqətli olmağı xahiş edib və sosial mediada hadisəni siyasi məqsədlər üçün istifadə edənlərə etibar etməməyi tövsiyə edib.

O, şəhidlərə Allahdan rəhmət diləyib, ailələrinə və Türk Silahlı Qüvvələrinə başsağlığı verib və mesaj və zənglə dəstək verən bütün dost və qardaş ölkələrə təşəkkürünü bildirib.