BAKI, AzerVoice
Suriya Xarici İşlər Nazirliyi İsrailin hücumlarını “qətiyyətlə” pisləyib.
AzerVoice xəbər verir ki, nazirlikdən verilən yazılı açıqlamada İsrailin qısa müddətdə Suriyada 5 fərqli nöqtəyə hava hücumu təşkil etdiyi və bunun Həma hava limanının demək olar ki, tamamilə dağılmasına, onlarla mülki və hərbçinin yaralanmasına səbəb olduğu bildirilib.
Bəyanatda İsrailin Suriya ərazisinə hücumları "qətiyyətlə" pislənilib və BMT-dən Təl-Əviv administrasiyasının pozuntularının təkrarlanmasının qarşısını almaq üçün təcili tədbirlər görməsi istənilib.
İsrail təyyarələri dünən axşam saatlarında Həma hava limanı və ətraf məntəqələrə 14-dən çox hava hücumu həyata keçirib, həmçinin Homs əyalətindəki T4 Hərbi Hava Limanına və paytaxt Dəməşqdəki hərbi infrastruktura hava zərbələri, Dera vilayətinin qərbində isə minaatan və artilleriya hücumları təşkil edib.
Qeyd edək ki, dekabrın 8-də İsrail ordusu 1967-ci ildən işğal etdiyi Qolan təpələrinə bitişik bufer zonasını işğal edib.İsrail əsgərləri işğalı bufer zonadan kənara çıxararaq paytaxt Dəməşqin 20 kilometrliyinə çatmışdı.