BAKI, AzerVoice, Nailə Babazadə

2025-ci il Fransa Superkuboku oyunu Paris Sen-Jermen (PSJ) ilə Marsel komandaları arasında baş tutacaq. Görüşün 2026-cı il yanvarın 8-də Küveytin paytaxtında yerləşən 58 min tamaşaçı tutumuna malik Caber Əl-Əhməd Beynəlxalq Stadionunda keçirilməsi qərara alınıb.

AzerVoice xəbər verir ki, keçən mövsüm final oyunu Qətərin Doha şəhərində təşkil olunmuşdu. Beləliklə, Fransa Superkuboku ardıcıl ikinci dəfə Asiyada baş tutacaq. Ənənəyə uyğun olaraq, Superkubokda Liqa 1 çempionu ilə Fransa Kubokunun qalibi qarşılaşır. 2024–2025 mövsümündə hər iki kuboku qazanan PSJ, finalda Liqa 1-in ikincisi Marsel ilə üz-üzə gələcək.

İki əzəli rəqib bu turnirdə daha əvvəl 2010 və 2020-ci illərdə qarşılaşıb. 2010-da Marsel, 2020-də isə PSJ qalib olmuşdu.

Qeyd edək ki, Fransa Superkuboku 2009-cu ildən etibarən ölkə xaricində təşkil olunur. Bu illər ərzində oyunlar Kanada, ABŞ, Mərakeş, Tunis, Avstriya və İsraildə baş tutub. 2023-cü ildə isə Taylandda keçirilməsi planlaşdırılan final oyunu ləğv edilərək Parisdəki Parc des Princes stadionuna keçirilmişdi.