BAKI,AzerVoice, Fərid Mikayılov
Argentina millisinin kapitanı Lionel Messinin beynəlxalq karyerasını başa vurmaq ehtimalı ölkədə ciddi müzakirələrə səbəb olub.
AzerVoice xəbər verir ki, 38 yaşlı futbolçu 2026-cı il dünya çempionatından sonra yığmadan ayrılacağını istisna etməsə də, sabiq komanda yoldaşları və futbol ictimaiyyəti ona bu qərarı tələsmədən verməyi tövsiyə edir.
Messi 2005-ci ildə debüt etdiyi Argentina millisində indiyədək 193 oyun keçirib və 112 qol vurub. O, yığma ilə dünya çempionluğu, iki dəfə Kopa Amerika və 2008-ci ildə Olimpiya qızıl medalını qazanıb. Uzun illərdir Albiselestenin simasına çevrilən futbolçu artıq karyerasının son mərhələsindədir.
Ulduz futbolçu cümə axşamı Venesuelaya qarşı keçiriləcək seçmə mərhələ görüşünün özünün Argentina millisindəki son rəsmi ev oyunu ola biləcəyini açıqlayıb.
“Bu, mənim üçün çox xüsusi bir matç olacaq, çünki son seçmə oyunumdur. Nə baş verəcəyini bilmirəm, amma ailəm — həyat yoldaşım, övladlarım, valideynlərim və bacı-qardaşlarım — hamısı mənimlə olacaq. Biz bu anı birlikdə yaşayacağıq”- deyə Messi bildirib.
Messi 2026-cı il dünya çempionatına qədər millidə qalmağı planlaşdırır. Lakin bundan sonrakı gələcəyi, həmçinin hazırda çıxış etdiyi İnter Mayamidə müqaviləsinin uzadılıb-uzadılmayacağı hələ dəqiq bilinmir.
