BAKI, AzerVoice, Nailə Babazadə

ABŞ Prezidenti Donald Tramp, Venesuela Prezidenti Nikolas Maduro ilə görüşmək ehtimalına açıq olduğunu bildirib.

AzerVoice xəbər verir ki, Tramp bu barədə Şükran Günü tətili üçün Vaşinqtondan Florida ştatına yola düşərkən təyyarədə jurnalistlərin suallarını cavablandırarkən danışıb.

Prezident Tramp, ABŞ–Venesuela münasibətlərindəki gərginliyə görə bir daha Maduro hökumətini günahlandırsa da, dialoqa hələ də açıq olduğunu vurğulayıb. O, ABŞ-ın Venesueladakı bir təşkilatı “xarici terror təşkilatları” siyahısına salması və həmin qurumun başında Maduro-nun olduğu iddialarına toxunan jurnalistin “Niyə hələ də onunla görüşmək istəyirsiniz?” sualına belə cavab verib:

“Əgər bəzi həyatları xilas edə bilsək, işləri asan yolla həll edə bilsək, bu əla olar. Əgər çətin yolla həll etməli olsaq, bu da problem deyil.”

Tramp görüşün məqsədinə dair sualı isə: “Bu məqsədin nə olduğunu yəqin ki, bilirsiniz”, – deyə cavablandırıb və əsas hədəfin Venesuela ilə bağlı mövcud problemləri aradan qaldırmaq olduğunu qeyd edib.

ABŞ administrasiyası daha əvvəl Maduro və yüksək rütbəli venesuelalı rəsmilərin rəhbərlik etdiyini iddia etdiyi “Cartel de los Soles” cinayət təşkilatını Xarici Terror Təşkilatları siyahısına daxil etmişdi. Venesuela rəhbərliyi isə bu addımı ölkəyə müdaxilə üçün bəhanə kimi qiymətləndirmişdi.

Bundan əvvəl ABŞ-ın “narkotik qaçaqmalçılığı ilə mübarizə” adı altında dünyanın ən böyük təyyarədaşıyan gəmisi USS Gerald R. Ford və ona bağlı hücum qrupunu Latın Amerikası bölgəsinə göndərdiyi bildirilmişdi. Venesuela Prezidenti Maduro isə buna cavab olaraq ölkədə 4,5 milyonluq milis qüvvəsinin səfərbər edildiyini və mümkün hücuma qarşı hazır olduqlarını açıqlamışdı.