BAKI, AzerVoice, Orxan Qədirzadə

İsrail parlamenti Birləşmiş Millətlər Təşkilatının Yaxın Şərqdəki Fələstinli Qaçqınlara Yardım və İşlər üzrə Agentliyinin (UNRWA) ofislərinə elektrik və su təchizatının dayandırılmasını nəzərdə tutan qanun layihəsini təsdiqləyib.

AzerVoice-un məlumatına görə, İsrailin Maariv qəzetinin yazdığına əsasən, UNRWA-nın fəaliyyətinin dayandırılmasını və agentliyə məxsus obyektlərə kommunal xidmətlərin kəsilməsini hədəfləyən layihə Knessetin Xarici Əlaqələr və Müdafiə Komitəsində ikinci və üçüncü oxunuş üçün təsdiq olunub.

Qeyd olunur ki, sözügedən qanun layihəsi noyabr ayında keçirilən ilkin səsvermədə 120 yerlik parlamentdə 28 lehinə, 8 əleyhinə səslə qəbul edilmiş, daha sonra müvafiq komitənin müzakirəsinə çıxarılmışdı. Layihənin qanun statusu alması üçün yaxın günlərdə parlamentdə keçiriləcək ikinci və üçüncü oxunuşdan da keçməsi tələb olunur.

İsrailin energetika naziri Eli Koen məsələ ilə bağlı sosial şəbəkədə paylaşım edərək UNRWA-nın fəaliyyətinə qarşı atılan addımı təsdiqləyib.

Xatırladaq ki, İsrail parlamenti 2024-cü ilin oktyabrında UNRWA-nın işğal altındakı Şərqi Qüds də daxil olmaqla İsrail ərazisində fəaliyyətinin dayandırılmasını nəzərdə tutan başqa bir qanun layihəsini də qəbul etmişdi. Həmin qərar 1 fevral tarixindən qüvvəyə minib və bunun ardınca UNRWA-nın beynəlxalq əməkdaşları Şərqi Qüdsü tərk edib.

Ekspertlərin qiymətləndirməsinə görə, UNRWA-nın fəaliyyətinin məhdudlaşdırılması Fələstin ərazilərində yaşayan təxminən 2,5 milyon qaçqının humanitar vəziyyətinə ciddi təsir göstərə bilər.

Qeyd edək ki, ABŞ Prezidenti Donald Tramp da fevralın əvvəlində ölkəsinin UNRWA və BMT-nin İnsan Hüquqları Şurası ilə bağlı iştirakını dayandıran sərəncam imzalayıb.