BAKI, AzerVoice , Nərmin Ağayeva
Qəzzada İsrail hücumu nəticəsində keçmiş Fələstin milli futbolçusu, “Fələstin Pelesi” ləqəbli Süleyman əl-Obeidin (41) öldürülməsi beynəlxalq idman ictimaiyyətində böyük rezonans doğurub.
AzerVoice xəbər verir ki, BMT-nin Fələstin üzrə xüsusi məruzəçisi Françeska Albanese Avropa Futbol Assosiasiyaları İttifaqına (UEFA) müraciət edərək, İsrailin Qəzza zolağında hərbi cinayətlər törətdiyini bildirib və ölkənin futbol yarışlarından kənarlaşdırılmasını tələb edib.
Albanese X platformasında UEFA-nın əl-Obeidin ölümünə dair paylaşımına istinad edərək, “UEFA, qatillərini yarışlarımızdan qovmağın vaxtıdır. Gəlin idmanımızı ayrı-seçkilik və soyqırımdan təmizləyək” sözlərini yazıb.
Məsələyə Misirli futbol ulduzu Məhəmməd Salah da reaksiya verib. O, UEFA-nın əl-Obeidin ölüm səbəbini qeyd etmədən paylaşım etməsini tənqid edərək, “Əl-Obeidin necə, harada və niyə öldüyünü bizə deyə bilərsinizmi?” sualını ünvanlayıb.
UEFA-nın paylaşımı iki gün ərzində 94 milyon baxış toplayıb və on minlərlə şərh yazılıb.
