BAKI, AzerVoice, Səməd Əyyubov – ABŞ-ın “İnter Mayami” klubunda çıxış edən argentinalı hücumçu Lionel Messi, Liqa Kubokunun “Nekaksa”ya qarşı keçirilən ev oyununda zədələnib.
AzerVoice-un məlumatına görə, Messi qarşılaşmanın 11-ci dəqiqəsində ayağında hiss etdiyi ağrı səbəbindən əvəzlənib. Matçdan sonra “İnter Mayami”nin baş məşqçisi Xavyer Maskerano bildirib ki, futbolçu dizaltı vətər nahiyəsində narahatlıq hiss edib. Zədənin dəqiq xarakteri daha sonra müəyyənləşəcək.
Qeyd edək ki, 38 yaşlı Messi 2023-cü ilin yayından etibarən “İnter Mayami”də çıxış edir. O, ötən mövsüm MLS-in əsas mərhələsinin qalibi olub və turnirin ən yaxşı futbolçusu seçilib. Hazırda onun klubla müqaviləsi bu ilin sonunadək qüvvədədir.
Messi karyerası ərzində İspaniyanın “Barselona” və Fransanın “Paris Sen-Jermen” klublarında da çıxış edib. O, səkkiz dəfə “Qızıl top” mükafatına layiq görülüb. Argentina millisinin heyətində 2022-ci il Dünya Çempionatının, eləcə də 2021 və 2024-cü illərdə keçirilən Amerika Kubokunun qalibi olub.
