BAKI, AzerVoice
Fransalı hücumçu Olivier Jiru MLS-də keçirdiyi qısa müddətli macəradan sonra vətəninə qayıdır.
AzerVoice xəbər verir ki, təcrübəli forvardın Lill klubu ilə bir illik müqavilə imzalaması razılaşdırılıb.
38 yaşlı futbolçu hazırda çıxış etdiyi Los-Anceles FC (LAFC) ilə müqaviləsi dekabr ayında başa çatmasına baxmayaraq, tərəflər vaxtından əvvəl ayrılığa hazırlaşır. Bu isə Jirunun yay transfer dövründə Lill-ə keçidini mümkün edəcək.
MLS-də gözləntiləri doğrultmayan Jiru, LAFC ilə 37 oyunda cəmi 5 qol və 3 assistlə yadda qaldı. Baxmayaraq ki, o, 2024-cü il ABŞ Açıq Kubokunun qalibi olub və FIFA Klub Dünya Çempionatında da iştirak edib. Lakin LAFC-dəki çıxışı, xüsusilə də məhsuldarlıq baxımından zəif qiymətləndirilir.
Lill klubu isə Kanada əsilli hücumçu Conatan Devidin komandadan ayrılmasından sonra Jirunu təcrübəli alternativ kimi heyətə qatmaq niyyətindədir.
“Onun komandamıza qoşulmasını çox istərdim. O, bizə lazım olan bütün keyfiyyətlərə sahibdir: taktiki uyğunluq, təcrübə, peşəkarlıq və insani dəyərlər. Amma o hələ də başqa bir klubun oyunçusudur və bu transferin baş verməsi asan görünmür”- deyə klubun prezidenti bildirib.
Jiru üçün bu transfer emosional bir geri dönüş olacaq. O, sonuncu dəfə Fransada 2011-2012 mövsümündə Montpellier klubunun heyətində çıxış edib və həmin mövsüm Liqa 1-in çempionu olub. Daha sonra Arsenal, Çelsi və Milan kimi klublarda uğurlu karyera qurub.
