BAKI, AzerVoice, Orxan Qədirzadə
Livan məhkəməsi, keçmiş Liviya lideri Muəmmar Qəddafinin oğlu Hannibal Qəddafinin on il davam edən həbsinə son qoyaraq onun 11 milyon dollarlıq girov qarşılığında azadlığa buraxılmasına qərar verib.
AzerVoice xəbər verir ki, bununla yanaşı, Qəddafiyə ölkədən çıxmaq qadağan olunub.
Məhkəmənin qərarı, şiə lideri İmam Musa Sədrin və iki müşahidəçisinin 1978-ci ildə Liviyada yoxa çıxması ilə bağlı aparılan istintaq çərçivəsində verilib.
Məlumata görə, istintaq hakimi Zaher Həmadə Hannibal Qəddafinin azadlığa buraxılması qərarını təsdiqləyib. Qəddafi 2015-ci ilin dekabrında Livanda “cinayət işi üzrə məlumatları gizlətmək” ittihamı ilə saxlanılmışdı.
Qəddafinin vəkili Loran Bayon qərarı ədalətsiz adlandıraraq bildirib.
“Bu, on il davam edən əsassız və qanunsuz saxlanmanın ardından qəbuledilməz qərardır. Müştərim beynəlxalq sanksiyalar altındadır — bu məbləği necə ödəyə bilər?”-deyə Bayon bildirib.
O, əlavə edib ki, girov tələbinə qarşı apellyasiya şikayəti veriləcək.
Keçmiş Liviya liderinin oğlu olan 49 yaşlı Hannibal Qəddafi, Livanlı model ilə evlidir və uzun illər Beyrutda saxlanılıb. Onun səhhətinin son aylarda pisləşdiyi, vəziyyətinin “narahatedici” olduğu bildirilirdi.
“Human Rights Watch” təşkilatı avqust ayında dərc etdiyi hesabatda Livan hökumətini Qəddafini dərhal azad etməyə çağırmış və onun “əsassız ittihamlar” əsasında saxlanıldığını bildirmişdi.
Qərar Livan və Liviya arasında diplomatik münasibətlərə də təsir göstərə bilər. “Əl-Nəhar” qəzetinin yazdığına görə, son aylarda ABŞ-ın dolayı dəstəyi ilə Beyrut və Tripoli arasında bu məsələni həll etmək üçün diplomatik səylər göstərilirdi. Lakin İmam Musa Sədrin ailəsi hər hansı razılaşmaya qarşı çıxaraq bəyan edib ki, :“Qan üzərində güzəşt olmaz - həqiqət tam şəkildə açıqlanmayınca heç bir barışıq qəbul edilə bilməz.”
Liviya Milli Birlik Hökumətinin Ədliyyə Nazirliyi 2024-cü ildə Livan hökumətinə müraciət edərək Qəddafinin azadlığa buraxılmasını və ona tibbi yardım göstərilməsini tələb etmişdi. Nazirlik bildirib ki, onun barəsində irəli sürülən ittihamların heç bir sübutu yoxdur.
Xatırladaq ki, Muəmmar Qəddafi 2011-ci ildə xalq üsyanı zamanı öldürülmüşdü. Hannibal Qəddafi isə o dövrdə Suriya ərazisində siyasi sığınacaq almış, daha sonra Livana gətirilərək həbs edilmişdi.