BAKI, AzerVoice, Orxan Qədirzadə
ABŞ-ın vitse-prezidenti C.D. Vens və xüsusi elçisi Stiv Uitkof bazar ertəsi İsrailə səfər edəcəklər.
AzerVoice xəbər verir ki, səfərin məqsədi ABŞ Prezidenti Donald Trampın Qəzza ilə bağlı sülh planının həyata keçirilməsi və prosesdə əldə olunan irəliləyişlərin müzakirəsidir.
Məlumata görə, Vens səfər zamanı Qəzzada həlak olmuş israilli girovların cəsədlərinin qaytarılması və müharibənin tam dayandırılması məsələlərini müzakirə edəcək.
Gündəliyə, həmçinin Trampın sülh planının ikinci mərhələsi – “HƏMAS”ın silahsızlaşdırılması və Qəzzada yeni müvəqqəti idarəetmə strukturunun yaradılması da daxildir.
İsrailin Yedioth Ahronoth qəzetinin internet nəşri Ynet yazır ki, Uitkof və Vensin səfəri atəşkəsin qorunması və qalan girovların azad edilməsini təmin etmək məqsədilə ABŞ-ın davam edən diplomatik səylərinin bir hissəsidir.
Digər tərəfdən, “HƏMAS” hərəkatı cümə günü vasitəçilərə atəşkəs sazişinin növbəti mərhələlərinin icrasını sürətləndirmək çağırışı edib. Bu mərhələlərə sərhədlərin yenidən açılması, humanitar yardımların buraxılması, bərpa işlərinə başlanması və İsrail qüvvələrinin tam geri çəkilməsi daxildir. Bu barədə Reuters agentliyi məlumat yayıb.
Qəzzada döyüşlər əsasən Trampın planı çərçivəsində dayandırılıb. Plan Misir, Qətər və Türkiyə tərəfindən dəstəklənib və bu ölkələr vasitəçilik prosesində fəal iştirak ediblər. Lakin növbəti addımların icrası bir sıra səbəblərdən, o cümlədən İsrailin “HƏMAS”ı girov cəsədlərinin təhvilində yubanmaqda ittiham etməsi səbəbindən ləngiyir.
İsrail cümə axşamı bəyan edib ki, Rəfəh sərhəd-keçid məntəqəsini yenidən açmağa hazırlaşır, lakin dəqiq tarix göstərilməyib.
Tərəflər atəşkəsin pozulması ilə bağlı qarşılıqlı ittihamları davam etdirirlər.
Tramp planının hələ də müzakirə olunan elementləri sırasında “HƏMAS”ın silahsızlaşdırılması və Qəzzanın gələcək idarəetmə modeli yer alır. “HƏMAS” hərəkatı isə atəşkəsə sadiq qaldığını və bütün qalan girovların cəsədlərinin təhvil veriləcəyini bildirib, lakin bu prosesin bir qədər vaxt ala biləcəyini qeyd edib.