BAKI, AzerVoice
UEFA Millətlər Liqasının yarımfinalında Almaniya və Portuqaliya milliləri üz-üzə gələcək.
AzerVoice xəbər verir ki, Almaniyanın Münhen şəhərindəki "Allianz Arena"da oynanılacaq qarşılaşma yerli vaxtı ilə saat 23:00-da başlayacaq. Qarşılaşmanın baş hakimi sloveniyalı baş hakim Slavko Vinçiç olacaq.
Qrup mərhələsini 14 xalla lider kimi başa vuran Almaniya 1/4 finalda İtaliyanı 2-1 və 3-3 hesabları ilə mübarizədən kənarlaşdırıb, Portuqaliya isə ümumi hesabda 5-2 hesabı ilə Danimarkanı məğlub edib.
Qeyd edək ki, digər yarımfinal matçında isə İspaniya və Fransa 5 İyunun cümə axşamı günü Ştutqartdakı MHP Arenasında eyni vaxtda üz-üzə gələcək.
Yarımfinalda məğlub olanlar 8 iyun Bazar günü, yerli vaxtı ilə saat 17:00-da Ştutqartda üçüncü yer uğrunda mübarizədə meydançaya çıxacaqlar.
Həmin gün saat 23:00-da Münhendə Millətlər Liqasında 2024-2025-ci il mövsümünün çempionunu müəyyən edəcək final matçı keçiriləcək.
Bu il dördüncü dəfə keçirilən UEFA Millətlər Liqasının daha əvvəl çempionu Portuqaliya, Fransa və İspaniya olub.
