BAKI, AzerVoice, Nailə Babazadə
7 dekabr 2025-ci ildə səyyah yazıçı və səyahət bloggeri İradə Qədirovanın “Səninləyəm” adlı yeni kitabının təqdimatı Bakı şəhərində “Litera book cafe”də baş tutub. Müəllifin sayca dördüncü kitabı olan “Səninləyəm” “Kərbəladan Konyaya kimi küldən doğuluş hekayəsi” mövzusu ilə oxuculara təqdim olunub.
AzerVoice xəbər verir ki, tədbirdə kitabın nəşr olunduğu MİMTA yayımlarının və Füyuzat dərgisinin nümayəndələri, əməkdar jurnalist və yazıçı Yunis Orucov, eləcə də Venesuela Bolivar Respublikasının Azərbaycandakı səfiri Kristofer Martinez iştirak edərək çıxış ediblər. Qonaqlar müəllifi yeni əsərə görə təbrik edib, kitabın ruhunu, təhkiyə tərzini və mövzusunun dərinliyini xüsusilə vurğulayıblar.
İradə Qədirovanın “Səninləyəm” əsəri insanın özünə qarşı törətdiyi ən dərin və səssiz xəyanətin hekayəsini təqdim edir. Müəllifin fikrincə:
“İnsanın ən böyük faciəsi: özünə xəyanət etdiyini hamıdan gizlədə bilir, yalnız özündən başqa.”
Əsərdə göstərilir ki, insan başqasının xəyanətini dana, unuda, hətta bağışlaya bilər, lakin özünə xəyanətin izlərindən nə gizlənə, nə də qaça bilər.
“Səninləyəm” insanın özünü bağışlama prosesini, daxili ağrı ilə mübarizəsini və itirdiyi mənliyini yenidən tapmaq cəhdini emosional və real dillə təsvir edir. Bu hekayə həm zahiri səfərlərdən, həm də ən çətin — insanın öz daxilinə etdiyi yolculuqdan bəhs edir.
Əsərdə hadisələr Almaniya, Türkiyə (İstanbul, Antalya, Isparta, Burdur, Konya), İraq, Özbəkistan, Venesuela, Misir və Səudiyyə Ərəbistanında cərəyan edir. Yazıçı bu ölkələri yalnız zahiri səhnə kimi deyil, qəhrəmanın batini dönüşümünün məkanları kimi təqdim edir. Coğrafiya dəyişdikcə insanın özünə baxışı, dərk prosesi və mənəvi yenidən doğuluşu da dərinləşir.
Qeyd edək ki, İradə Qədirovanın bundan əvvəl “Əfşan: İran boyunca tək səyahətim”, “Eşqin izi ilə” və “Dünya Vətəndən başlayır” kitabları geniş oxucu auditoriyası tərəfindən maraqla qarşılanıb. Müəllif maarifləndirici fəaliyyətini və səyahətlərini sosial şəbəkələr üzərindən fəal şəkildə davam etdirir.
