BAKI, AzerVoice, Orxan Qədirzadə
Türkiyə Prezidenti Rəcəb Tayyib Ərdoğan ayrı-seçkiliyi hədəf alan siyasətlərin qəbuledilməz olduğunu bəyan edərək, hökumətin daxili birlik, sosial ədalət və insan hüquqları prinsipindən geri çəkilməyəcəyini bildirib.
AzerVoice xəbər verir ki, Prezident Ərdoğan bu fikirləri Prezident Sarayında keçirilən Nazirlər Kabinetinin iclasından sonra verdiyi açıqlamada səsləndirib. Onun sözlərinə görə, Türkiyə regionda və dünyada mürəkkəb geosiyasi proseslər fonunda müəyyən etdiyi strateji hədəflərə ardıcıl və qətiyyətlə doğru irəliləyir.
Ərdoğan vurğulayıb ki, ölkənin gücü etnik, dini və məzhəbi fərqlərdən asılı olmayaraq cəmiyyətin bütün təbəqələrinin birliyindən qaynaqlanır. O bildirib ki, qadınlara, alevilərə, kürdlərə və digər sosial qruplara qarşı yönəlmiş təxribat xarakterli çağırışlara qarşı nifrət siyasətinə deyil, daha möhkəm həmrəyliyə üstünlük veriləcək.Prezident Ərdoğan Türkiyənin insan hüquqları və ədalət sahəsində əldə etdiyi nəticələrə də toxunub. Onun sözlərinə görə, son 23 ildə ölkədə məhkəmə infrastrukturu, hakim və prokurorların sayı əhəmiyyətli dərəcədə artırılıb, məhkəmə proseslərinin müddəti qısaldılıb.
Ərdoğan qeyd edib ki, Türkiyənin Avropa İnsan Hüquqları Məhkəməsinin qərarlarına əməl etmə göstəricisi 90 faizə çataraq bir çox Avropa ölkələrini geridə qoyub. O, bu sahədə Türkiyəyə qarşı selektiv və qeyri-obyektiv yanaşmaların mövcud olduğunu da bildirib.
Prezident çıxışında Qəzza, Suriya, Somali, Liviya və Yəməndə davam edən münaqişələrə toxunaraq, Türkiyənin bu bölgələrdə barış və ədalətə əsaslanan siyasət yürütməklə beynəlxalq ictimaiyyətə insan hüquqları baxımından nümunə göstərdiyini deyib.
Ərdoğan İsrailin Qəzzada apardığı hərbi əməliyyatları sərt tənqid edib, eyni zamanda Suriyada uzun illər davam edən insan hüquqları pozuntularının beynəlxalq mexanizmlər tərəfindən qarşısının alınmadığını vurğulayıb.
Prezident hökumətin nəqliyyat və logistika sahəsində genişmiqyaslı layihələri davam etdirdiyini bildirib. Onun sözlərinə görə, Türkiyənin dəniz ticarət donanması dünya üzrə ilk onluğa daxil olub, limanlarda yüklərin həcminin isə 2025-ci ildə 550 milyon tona çatması gözlənilir.
Ərdoğan paytaxt Ankara üçün strateji əhəmiyyət daşıyan Esenboğa Hava Limanı metro xəttinin tikintisinə 2026-cı ildə başlanmasının planlaşdırıldığını da açıqlayıb.Prezident Macarıstan, Türkmənistan və Türk Dövlətləri Təşkilatı çərçivəsində əməkdaşlığın gücləndirildiyini, ikitərəfli ticarət dövriyyəsinin artırılması üçün konkret hədəflər müəyyən edildiyini bildirib.
Sonda Ərdoğan vurğulayıb ki, hökumət fəaliyyəti boyunca ictimai etimadın qorunmasına xüsusi həssaslıqla yanaşılıb və bu yanaşma gələcəkdə də davam etdiriləcək.