BAKI, AzerVoice, Orxan Qədirzadə

Səudiyyə Ərəbistanının Ciddə şəhərində yerləşən Kral Əbdüləziz Beynəlxalq Hava Limanı (KAIA) 2025-ci il ərzində 50 milyonuncu sərnişinə xidmət göstərərək tarixi rekorda imza atıb. Bu göstərici krallıqda mülki aviasiyanın yaranmasından bəri bir hava limanı üzrə qeydə alınmış ən yüksək sərnişin sayıdır.

AzerVoice xəbər verir ki, Səudiyyə Ərəbistanı Mətbuat Agentliyinin (SPA) məlumatına görə, rekord göstərici KAIA-nı sərnişin axını baxımından dünyanın iri “meqa hava limanları” sırasına daxil edib. Bildirilir ki, 2025-ci ildə qeydə alınan 50 milyon sərnişin göstəricisi 2024-cü ildəki 49,1 milyon sərnişinlə müqayisədə 1,83 faiz artım deməkdir.

Məlumatda vurğulanır ki, bu nailiyyət hava limanında həyata keçirilən keyfiyyət transformasiyasını, onun regional nəqliyyat mərkəzi və krallığın dünyaya açılan əsas qapılarından biri kimi mövqeyinin möhkəmləndiyini əks etdirir.

Hava limanının fəaliyyəti Səudiyyə Ərəbistanının qlobal turizm mərkəzi kimi mövqeyinin gücləndirilməsində, həmçinin iki Müqəddəs Məscidə – Məkkə və Mədinəyə səfər edən zəvvarların, ümrə icra edənlərin və turistlərin hərəkətinin asanlaşdırılmasında mühüm rol oynayır. KAIA məhz bu şəhərlərə aparan əsas hava qapısı kimi çıxış edir.

50 milyonuncu sərnişin Parisdən Ciddəyə Saudia aviaşirkətinin reysi ilə gələn Fransa vətəndaşı olub. O, Ciddədə keçirilən idman turnirində iştirak etmək üçün ölkəyə səfər edib. Sərnişin hava limanını idarə edən JEDCO rəhbərliyi tərəfindən qarşılanıb və hadisə münasibətilə ona xatirə hədiyyəsi təqdim olunub.

JEDCO-nun baş icraçı direktoru Mazen Cohar bildirib ki, 50 milyon sərnişin həddi hava limanının yüksək əməliyyat hazırlığını nümayiş etdirir və yaxın illərdə bu göstəricinin ikiqat artırılması istiqamətində görülən işlər üçün mühüm mərhələ hesab olunur.