Bakı, AzerVoice

"Qalatasaray" bu mövsüm Avropanın ən güclü 10 liqasında çıxış edən komandalar arasında ən uzun məğlubiyyətsizlik seriyasına sahib komanda olaraq zirvədə qərarlaşıb.

AzerVoice xəbər verir ki, İngiltərənin "Liverpul" klubu İngiltərə Liqa Kubokunun yarımfinalında "Tottenhem"ə məğlub olaraq 24 oyunluq məğlubiyyətsizlik seriyasını başa vurub. Bununla da 22 matçdır uduzmayan "Qalatasaray" Avropanın top liqalarında bütün yarışlar üzrə ən uzun məğlubiyyətsizlik seriyası olan komanda olub.

Sarı-qırmızılı komanda sonuncu dəfə Ziraat Türkiyə Kubokunda RAMS Başakşəhərlə 2-2 hesablı heç-heçə edib və hazırda məğlubiyyətsizlik seriyasını 22 oyuna çatdırıb.

Bu uğur Fransanın "Lill" (18 oyun) və Belçikanın "Brügge" (15 oyun) komandalarını geridə qoyub. Əgər "Qalatasaray" növbəti 3 rəsmi oyunda da məğlub olmazsa, "Liverpul"un 24 matçlıq seriyasını keçərək 25 oyunluq məğlubiyyətsizlik rekordu qıracaq.

"Qalatasaray" bu mövsüm Trendyol Super Liqasının da lideridir. Komanda liqada keçirdiyi 17 oyunda 15 qələbə qazanıb, 2 dəfə isə heç-heçə edib.

Liqada 49 qol vuraraq, 20 qol buraxan sarı-qırmızılılar, son məğlubiyyətini ötən mövsümün 37-ci həftəsində "Fənərbağça"ya qarşı qəbul edib.

"Qalatasaray" UEFA Avropa Liqasında da məğlubiyyətsiz yoluna davam edir. "Cimbom" qrup mərhələsində “Latsio”, “Atletik Bilbao”, “Anderlext” və “Mançester Yunayted”lə qarşılaşmalarda məğlub olmayıb.

Bu oyunlarda üç qələbə və üç heç-heçə ilə 12 xal toplayan "Qalatasaray" hazırda qrupda 6-cı pillədə qərarlaşıb. Komanda 15 qol vurub, 11 top isə buraxıb.