BAKI, AzerVoice
XRİTDX vətəndaşları saxta saytlara qarşı diqqətli olmağa çağırır.
AzerVoice xəbər verir ki, bu barədə Xüsusi Rabitə və İnformasiya Təhlükəsizliyi Dövlət Xidməti məlumat yayıb.
Qurumun yaydığı məlumata görə, son günlərdə sosial şəbəkələr və messencerlər vasitəsilə dövlət tərəfindən ünvanlı sosial yardımların verilməsi adı altında fişinq xarakterli saxta domenlər yayılır.
Bildirilir ki, xüsusilə Azərbaycan Respublikasının Rəqəmsal İnkişaf və Nəqliyyat Nazirliyinin və tabeliyində fəaliyyət göstərən İnnovasiya və Rəqəmsal İnkişaf Agentliyi PHŞ-yə məxsus “myGov” portalının adından istifadə edilərək saxtalaşdırılmış saytlar yaradılır və bu yolla vətəndaşların fərdi məlumatlarının ələ keçirilməsi hədəflənir.
Məlumatda qeyd olunur ki, həmin saxta saytlar vasitəsilə vətəndaşların kimlik məlumatları, istifadəçi hesabları, eləcə də bank kartları kimi mühüm məlumatlarının ələ keçirilməsinə cəhd edilir. Bu cür halların qarşısının alınması məqsədilə Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətinin Kompüter İnsidentlərinə Qarşı Mübarizə Mərkəzi tərəfindən bir sıra saxta domenlər müəyyən olunaraq müvafiq qurumlarla birgə ölkə üzrə bloklanıb.
Eyni zamanda, aşkar edilmiş saxta domenlərin siyahısının Mərkəzin “Blacklist.gov.az” platforması vasitəsilə ictimaiyyətə təqdim edildiyi vurğulanır. XRİTDX vətəndaşlara saxta domenlərlə rastlaşdıqda bu barədə Blacklist.gov.az platformasına məlumat əlavə etməyi, saxta saytlardan qorunmaq üçün brauzerlərində platformanın müvafiq genişlənməsindən istifadə etməyi və şübhəli saytlar və keçidlərə qarşı diqqətli olmağı tövsiyə edir.
