BAKI, AzerVoice Prof. Dr. Vissam Əli Xalidinin qələmindən / İraq
“İraq Ədiblər və Yazıçılar İttifaqının” mədəniyyət qəzetində “Şuşa – Azərbaycanın incisi” kitabı haqqında məqalə yazılıb. Kitabın müəllifi İraq Tədqiqatlar Mərkəzinin rəhbəri professor Mutəz Muhi Əbdülhəmiddir.
AzerVoice xəbər verir ki, yazıda müəllifin Şuşanı sadəcə tarixi və coğrafi məkan kimi deyil, Azərbaycan xalqının mədəni yaddaşında yaşayan canlı simvol kimi təqdim etdiyi vurğulanır. Qeyd olunur ki, bu əsər şəhəri fiziki sərhədlərdən çıxararaq onu ruhun, müqavimətin və milli kimliyin bir rəmzinə çevirir.
Məqalədə həmçinin kitabın dili, üslubu və struktur baxımından da yüksək qiymətləndirilməsi diqqət çəkir. Müəllif elmi araşdırma ilə poetik dili birləşdirərək Şuşanı nəinki təsvir edir, həm də oxucuya hiss etdirir. Şəhərin daşlarında tarix, küçələrində musiqi, səssizliyində isə xalqın harayı duyulur.
Qəzetin yazısında bildirilir ki, “Şuşa – Azərbaycanın incisi” kitabı təkcə bir şəhər haqqında deyil, həm də bütün bir millətin yaddaşı, mədəniyyəti və mövcudluğu uğrunda apardığı mübarizənin ədəbi ifadəsidir. Bu səbəbdən də əsər həm Azərbaycan, həm də region xalqları üçün dəyərli bir mədəni sənəd hesab olunur.
Beləliklə, “İttihad” qəzeti bu nəşrlə bir daha göstərir ki, ədəbiyyat və sənət vasitəsilə mədəni dialoq qurmaq və xalqlar arasında ortaq yaddaş körpüsü yaratmaq mümkündür.
