BAKI, AzerVoice
Pakistan, İsrailin İrana qarşı hücumlarını və ABŞ-ın İranın nüvə obyektlərinə hücumunu kəskin şəkildə qınayıb.
AzerVoice xəbər verir ki, bu barədə Pakistanın baş nazir müavini və xarici işlər naziri Məhəmməd İshaq Dar İslamabad Strateji Araşdırmalar İnstitutunun yaradılmasının 52-ci ildönümünə həsr olunmuş tədbirdə çıxışı zamanı deyib.
“Pakistan Yaxın Şərqdə baş verən son hadisələrdən narahatdır. Biz İsrailin İrana qarşı əsassız təcavüzünü, eləcə də ABŞ-ın İranın nüvə obyektlərinə hücumunu qətiyyətlə pisləyirik. Bu hücumlar BMT Nizamnaməsi ilə beynəlxalq hüququn pozulması deməkdir” – deyə, o bildirib.
İshaq Darın sözlərinə görə, ABŞ və İsrailin hücumları dövlətlərarası münasibətlərə dair qaydaları ciddi şəkildə sarsıdıb və bütün regionu potensial olaraq təsəvvürəgəlməz fəlakətlərə sürükləyib.
Nazir əlavə edib ki, İran bu qarşıdurmada “konstruktiv və praqmatik yanaşma” sərgiləyərək daha da dərinləşə biləcək eskalasiyanın qarşısını alıb.
“Biz bir daha vurğulayırıq ki, bütün maraqlı tərəflər konstruktiv şəkildə qarşılıqlı əlaqə qurmalı, həll olunmamış fikir ayrılıqlarını və münaqişələri dialoq və diplomatiya yolu ilə aradan qaldırmalıdır” – deyə, Dar bəyan edib.
Qeyd edək ki, iyunun 22-də ABŞ, İran və İsrail arasında baş verən qarşıdurmaya qoşularaq İranın "Fordo", "İsfahan" və "Nətənz" nüvə obyektlərinə hücum edib. Buna cavab olaraq, İran iyunun 23-də Qətərin paytaxtı Doha yaxınlığında yerləşən ABŞ-a məxsus Əl-Udeyd hərbi hava bazasına raket zərbəsi endirib. Qətər Silahlı Qüvvələri tərəfindən bildirilib ki, İrandan atılan 19 raketin 18-i havada zərərsizləşdirilib, yalnız biri bazaya düşüb. Hadisə nəticəsində tələfat olmayıb.
Zərbədən qısa müddət sonra ABŞ prezidenti Donald Tramp bəyan edib ki, İsrail və İran arasında atəşkəs rejiminin tətbiqi barədə razılıq əldə olunub.
