BAKI, AzerVoice
Beynəlxalq Atom Enerjisi Agentliyinin (MAQATE) baş direktoru Rafael Mariano Qrossi Əlcəzairi “dost ölkə” və “Afrika qitəsində əsas tərəfdaş” adlandırıb. O, MAQATE ilə Əlcəzair arasında uzun illər davam edən əməkdaşlığı yüksək qiymətləndirərək, ölkənin mülki nüvə texnologiyaları sahəsində əldə etdiyi mühüm nailiyyətləri vurğulayıb.
AzerVocie xəbər verir ki, AL24News kanalına eksklüziv müsahibəsində Qrossi bildirib ki, Əlcəzair artıq digər Afrika ölkələrinə nüvə enerjisi sahəsində dəstək vermək üçün zəruri potensiala malikdir. Onun sözlərinə görə, nüvə texnologiyası kənd təsərrüfatı və səhiyyə kimi mühüm sahələrdə tətbiq olunmaqla qlobal inkişaf problemlərinin həllində getdikcə daha vacib rol oynayır.
“Bu səfər uzun müddətdir planlaşdırılırdı və nəhayət, onu reallaşdıra bildik,” -deyə Qrossi bu həftə Əlcəzairə olan rəsmi səfərini şərh edib.
Onun sözlərinə görə, səfər zamanı çox məhsuldar görüşlər və dolğun proqram keçirildi və bu, son dərəcə səmərəli və pozitiv bir gün idi.”
O xatırladıb ki, Əlcəzair 1960-cı illərdən bəri MAQATE ilə əməkdaşlıq edir.
“Bu, tədqiqat reaktorlarına və nüvə tibbinə malik bir ölkədir. Uzunmüddətli əməkdaşlığımız zamanla inkişaf edərək Əlcəzairi bölgədə Agentliyin əsas tərəfdaşına çevirdi.”-deyə o qeyd edib.
Qrossinin sözlərinə görə, hazırda mülki nüvə enerjisi sahəsində fəaliyyətləri daha da gücləndirmək üçün yeni istiqamətlər araşdırılır. O vurğulayıb ki, Əlcəzair tibbi xidmətləri və iqtisadi artımı dəstəkləmək məqsədilə mülki nüvə enerjisindən istifadə edən əsas ölkələr sırasındadır.
“Əlcəzairin bu sahədə güclü ənənəsi -COMENA (Milli Atom Enerjisi Komissiyası), elmi institutlar, tədqiqat reaktorları və yüksək ixtisaslı mütəxəssislər fəaliyyət göstərir,” - deyə o bildirib.
Qrossi həmçinin qeyd edib ki, hazırda dünyada nüvə enerjisinə maraq yenidən artır - hətta bu sahəni hələ inkişaf etdirməmiş ölkələr arasında belə. “XXI əsrdə nüvə texnologiyaları sahəsində bir çox yeni alternativlər ortaya çıxıb,” - deyə o əlavə edib.
O, mülki nüvə enerjisinin xüsusilə səhiyyə sektorunda yeni və maraqlı mərhələlər açdığını vurğulayıb. Qrossinin sözlərinə görə, Əlcəzair hər il bir neçə Afrika ölkəsindən mütəxəssisləri təlimə qəbul edir. “Əlcəzairdə bu sahədə güclü imkanlar mövcuddur. MAQATE Əlcəzairi Afrikada mülki nüvə əməkdaşlığının mərkəzi kimi seçib,” - deyə o bəyan edib.