Bakı, AzerVoice

İranda mövcud rejim hakimiyyət dəyişikliyi ilə getməsə, nüvə məsələsi yenidən ciddi şəkildə gündəmə gələcək.

AzerVoice xəbər verir ki bunu Bizimyol.info-ya açıqlamasında siyasi şərhçi Rufiz Hafizoğlu bildirib.

Ekspertin sözlərinə görə, İran və İsrail arasındakı raket mübadiləsi zamanı İraqdakı proksi qüvvələrin (Həşdü Şabi, Mehdiyyə, Fatimiyyun və s.) prosesə qoşulmamasının əsas səbəbi Azərbaycanın diplomatik səyləri olub. O qeyd edib ki, Azərbaycanın müdaxiləsi nəticəsində bu qruplaşmalar, eləcə də Livandakı "Hizbullah" İsrail əleyhinə aksiyalardan çəkinib. Lakin politoloq xəbərdarlıq edir ki, yeni bir müharibə dalğası başlayarsa, bu qüvvələrin prosesə qoşulma ehtimalı olduqca yüksəkdir.

Regionu alovlandıra biləcək xəbərdarlıq

Rufiz Hafizoğlu vurğulayıb ki, İran rəsmilərinin "İranla müharibə regionu alovlandıra bilər" bəyanatı onların bu günə qədər dediyi ən doğru fikirdir. Tehranın hazırda maksimum vaxt qazanmağa çalışdığını və nüvə məsələsində müvəqqəti güzəştlərə gedə biləcəyini deyən ekspert, Türkiyənin bu məsələdə əvvəlki kimi vasitəçilik missiyasına yaxın durmamasını önəmli məqam kimi dəyərləndirib:

"Diplomatik güzəştlər ola bilər, lakin İranda sistem dəyişməsə, nüvə ambisiyaları yenidən aktivləşəcək".

Proksi qüvvələrin maliyyə qaynaqları

Politoloq regional qruplaşmaların vəziyyətinə də toxunub. O bildirib ki, HƏMAS hazırda ən ağır dövrünü yaşayır, Husilər isə Donald Trampla olan müəyyən "sövdələşmələr" sayəsində qismən neytrallıqlarını qoruyurlar.

İranın bu qruplaşmalara dəstəyinin rəsmi dövlət büdcəsindən deyil, qeyri-rəsmi yollarla həyata keçirildiyini deyən Hafizoğlu maraqlı faktlar açıqlayıb:

• Maliyyə vəsaitləri zəkat, sədəqə və ianələr adı altında toplanır.

• Bəşər Əsəd rejiminin zəifləməsindən sonra "Hizbullah"ın Suriyada qeyri-qanuni bazarları və gəlir mənbələrini idarə etdiyi üzə çıxıb.

• Toplanan pullar dolayı yollarla Husilərə və digər qruplaşmalara ötürülür.