BAKI,AzerVoice,Fərid Mikayılov
ABŞ Ədliyyə Nazirliyi pedofiliya şəbəkəsi yaratmaqla ittiham olunan Jeffrey Epşteyn işinə dair yeni sənədləri ictimaiyyətə təqdim edib.
AzerVoice xəbər verir ki, yeni açıqlanan sənədlərdə Bill Klintonun adı və fotoları geniş müzakirələrə səbəb olub.
Uzun müddət gözlənilən və “Epşteyn sənədləri” adlandırılan materialların yeni hissəsi artıq açıq şəkildə yayımlanıb. ABŞ Baş Prokurorunun müavini Todd Blanche bildirib ki, nazirlik cümə günü “bir neçə yüz min sənəd” açıqlayıb və gələcək həftələrdə əlavə sənədlər də yayımlanacaq. Blanche əlavə edib ki, “sənədlərin araşdırılması davam edərkən qanunlara və qurbanların qorunmasına uyğun əlavə məlumatlar təmin ediləcək”.
Konqresə göndərilən məktubdan məlum olub ki, sənədlərin yoxlanması zamanı min 200-dən çox şəxsin Epşteynin qurbanı və ya onların yaxınları olduğu müəyyən edilib. Ədliyyə Nazirliyi şəxslərin məxfiliyini qorumaq üçün identifikatorları və adları gizlədib və ya yayımlamayıb.
Yayımlanan sənədlərdə keçmiş ABŞ Prezidenti Bill Klinton ön plana çıxıb. Klintonun sözçüsü Angel Urena bildirib ki, keçmiş prezident 2002 və 2003-cü illərdə Epşteynin təyyarəsi ilə dörd beynəlxalq səfər edib. Urena qeyd edib ki, səfərlər Klinton Fondu ilə bağlı olub və hər səfərdə personal və Gizli Xidmət əməkdaşları müşayiət edib.
Sənədlərdə Klintonun Epşteynin şəriki Ghislaine Maxvell ilə hovuzda və jakuzidə çəkilmiş fotoları da yer alıb. Klinton əvvəllər Epşteynin cinayətlərindən xəbərsiz olduğunu və onları qınadığını açıqlayıb.
Həmçinin sənədlərdə Maykl Cekson, Virgin Group-un təsisçisi Richard Branson, müğənni Diana Ross, aktyor Chris Tucker və digər məşhurların Epşteyn və Maxvell ilə müxtəlif sosial mühitlərdə (Bali, Mərakeş, St. Tropez) çəkilmiş fotoları mövcuddur. Qeyd olunur ki, bu görüntülər şəxslərin hər hansı cinayətdə iştirak etdiyini göstərmir və kontekstdən çıxarılmamalıdır.
Sənədlərin açıqlanması zamanı Tramp, ABŞ Nümayəndələr Palatası tərəfindən təsdiqlənən qərarın üzərinə imza ataraq yayım məsuliyyətini öz üzərinə götürüb. Materiallar dörd əsas kateqoriya üzrə təqdim olunub: məhkəmə sənədləri, Ədliyyə Nazirliyinin şəffaflıq qanunu çərçivəsində açıqlamaları, məlumat əldə etmə tələbləri ilə alınan sənədlər və Nümayəndələr Palatası nəzarət komitəsinə təqdim olunan yazışmalar.
Qeyd edək ki, Epşteyn, 14 yaşdan kiçik 18 yaşadək onlarla qız uşağına cinsi istismar və fahişəlik şəbəkəsi yaratmaq ittihamı ilə Nyu York Manhattan Metropolitan Həbsxanasında saxlanarkən 10 avqust 2019-cu ildə ölü tapılmışdı.
Sənədlərdə həmçinin Prens Andrev, ABŞ Prezidenti Donald Tramp, keçmiş ABŞ Prezidenti Bill Klinton, keçmiş İsrail Baş naziri Ehud Barak, keçmiş ABŞ vitse-prezidenti Al Gore, aktyor Kevin Spacey, müğənni Maykl Cekson, sehrbaz David Copperfield, vəkil Alan Dershovitz və keçmiş Nyu Meksika qubernatoru Bill Riçardson kimi məşhurlar yer alıb.
ABŞ Federal Təhlükəsizlik Bürosu (FBI) və Ədliyyə Nazirliyi araşdırmalar nəticəsində bu şəxslərin hər hansı “müştəri siyahısı” ilə əlaqəsi olduğuna dair sübut tapılmadığını, Epşetynin isə həqiqətən intihar etdiyini açıqlayıb.
