BAKI, AzerVoice, Nailə Babazadə
ABŞ-da yaşamaq və işləmək imkanı yaradan, Green Card lotereyası kimi tanınan Çeşitlilik Vizesi (Diversity Visa) proqramının müddətsiz olaraq dayandırıldığı açıqlanıb.
AzerVoice xəbər verir ki, məlumata görə, ABŞ Prezidenti Donald Tramp Brown Universiteti və Massaçusets Texnologiya İnstitutunun (MIT) kampuslarında baş verən silahlı hücumdan sonra “Yaşıl Kart” lotereyası proqramının dayandırılması barədə qərar verib.
ABŞ-ın Daxili Təhlükəsizlik naziri Kristi Noem X platformasında paylaşdığı açıqlamada, Prezident Trampın göstərişi ilə ABŞ Vətəndaşlıq və Miqrasiya Xidmətinə (USCIS) proqramın dərhal dayandırılması tapşırığının verildiyini bildirib.
Kristi Noem paylaşımında, “Bu cinayətkarın ölkəmizə daxil olmasına heç vaxt icazə verilməməli idi”, – ifadəsini işlədib.
Qeyd edək ki, Çeşitlilik Vizesi proqramı ABŞ-da az təmsil olunan ölkələrin vətəndaşlarına, əsasən Afrika qitəsindən olan şəxslərə hər il püşkatma yolu ilə təxminən 50 min daimi yaşayış icazəsi (Green Card) verilməsini nəzərdə tuturdu.
2025-ci il üzrə Green Card lotereyasına təxminən 20 milyon nəfər müraciət edib, qaliblərin ailə üzvləri də daxil olmaqla 131 mindən çox şəxs seçilmişdi.
Proqram çərçivəsində seçilən şəxslər ABŞ-a qəbul edilməzdən əvvəl ciddi təhlükəsizlik yoxlamasından keçməli olurdular.
Məlumata görə, hücumda şübhəli bilinən şəxsin vətəndaşı olduğu Portuqaliya üçün 2025-ci il Green Card çəkilişində cəmi 38 nəfərlik kvota ayrılmışdı.