BAKI, AzerVoice, Nailə Babazadə

İran Xarici Əlaqələr üzrə Strateji Şura rəhbəri və ölkə lideri Əli Xameneinin baş müşaviri Kamal Xarazi bildirib ki, Tehran “bərabər status və qarşılıqlı hörmət” şərtilə ABŞ-la danışıqlara başlaya bilər.

AzerVoice xəbər verir ki, ABŞ mərkəzli CNN-ə danışan Xarazi, İran–ABŞ münasibətləri ilə bağlı sualları cavablandırıb.

“Əgər qarşılıqlı hörmət və bərabərlik əsasında, mövzu və danışıqların çərçivəsi əvvəlcədən müəyyən olunarsa, biz buna – ABŞ-la danışıqlara – hazırıq.” - deyə Xarazi qeyd edib.

Onun sözlərinə görə, ilk addımı ABŞ atmalıdır: “Bizim irəli sürdüyümüz şərtlər çərçivəsində bizimlə əlaqəyə girməyə hazır olduqlarını göstərməlidirlər.”

Xarazi İranın nüvə fəaliyyətlərinin davam edəcəyini vurğulayıb.

“Uranın zənginləşdirilməsini davam etdirməliyik. Çünki nüvə elektrik stansiyalarımız və tibbi fəaliyyətlərimiz üçün yanacağa ehtiyacımız var. Zənginləşdirməni dayandıra bilmərik, amma səviyyəsi müzakirə oluna bilər.”- deyə o əlavə edib.

O həmçinin bildirib ki, İran ballistik raket proqramından imtina etməyəcək və bu istiqamətdə işləri davam etdirəcək: “Biz özümüzü müdafiə etməliyik. İstehsal edə bildiyimiz bütün müdafiə silahlarını inkişaf etdirməyə davam edəcəyik. ABŞ və digər ölkələrlə yalnız nüvə məsələsini müzakirə edərik. Raket proqramı və digər mövzular danışıqlıq deyil.”

Bir sualı cavablandıran Xarazi, İsrail və ABŞ-ın hücumlarında hədəf alınan Natanz və Fordo nüvə obyektlərində araşdırmaların hələ başlamadığını deyib. O, həmçinin ölkə lideri Xameneinin kütləvi qırğın silahlarının istehsalını qadağan edən fətvasının dəyişməsinin mümkün olmadığını vurğulayıb.