BAKI, AzerVoice, Nailə Babazadə

Argentinada keçirilən parlament seçkilərini prezident Javier Milei-nin rəhbərlik etdiyi hakim partiya qazandı.

AzerVoice xəbər verir ki, Argentina mediasının məlumatına görə, səslərin 96 faizi sayıldıqdan sonra ilkin nəticələrə əsasən, Milei-nin partiyası La Libertad Avanza (“İrəliləyən Azadlıq”) 39 faiz səslə seçkilərdə qələbə əldə edib.

Peronist müxalifətin yaratdığı Fuerza Patria (“Vətən Gücü”) isə səslərin yalnız 29,4 faizini toplaya bilib.

Milei-nin partiyası paytaxt Buenos-Ayreslə yanaşı, Kordoba, Santa Fe və Mendoza kimi mühüm əyalət və bölgələrdə də uğur qazanıb.

Müxalifət isə 7 sentyabrda keçirilən əyalət seçkilərində qalib gəldiyi Buenos-Ayresdə bu dəfə gözlənilməz məğlubiyyətlə üzləşib.

Bu nəticələr hakimiyyətə islahat layihələrini həyata keçirmək və müxalifətin prezident fərmanlarını bloklama cəhdlərini zəiflətmək üçün ciddi üstünlük qazandırıb.

La Libertad Avanza, Senatda 8 seçki dairəsindən 6-da qalib gəlsə də, qənaət siyasətini həyata keçirmək üçün lazım olan üçdəbir çoxluğa hələ ki çatmayıb.

Seçkilərdə iştirak faizi 67,85 olub ki, bu da Argentinanın 1983-cü ildə demokratiyaya qayıdışından bəri ən aşağı göstərici kimi qeydə alınıb.