BAKI,AzerVoice, Fərid Mikayılov
Argentina millisinin hücumçusu Lautaro Martinez yığmanın tarixində iz qoyan uğura imza atıb.
AzerVoice xəbər verir ki, Dünya çempionatının seçmə mərhələsində Venesuela üzərində 3:0 hesablı qələbədə meydana sonradan daxil olan futbolçu iki dəqiqə sonra vurduğu qolla əfsanəvi Dieqo Maradonanı geridə qoyaraq, Albiseleste tarixində ən çox qol vuran beş oyunçudan biri olub.
74-cü dəqiqədə oyuna qoşulan Martinez cəmi iki dəqiqə sonra fərqlənərək milli komandadakı qol sayını 33-ə çatdırıb. Bununla da o, 32 qolu olan Maradonanı geridə qoyub və Argentina yığmasının ən məhsuldar futbolçular siyahısında ilk beşliyə adını yazdırıb.
2018-ci ildən millidə çıxış edən Martinez qısa zamanda etibarlı hücumçuya çevrilib. O, Argentina ilə üç böyük titul qazanıb: 2021 və 2024-cü illərdə Copa America, 2022-ci ildə isə Dünya çempionluğu. Həmçinin həmin il Finalissima kubokunu da qaldırıb. 2024-cü Copa America turnirində isə 5 qolla “Qızıl buts”un sahibi olub.
Hazırda “El Toro” ləqəbli forvardın qarşısında yeni hədəflər dayanır. Martinezə Hernan Kresponun (35 qol) göstəricisini keçmək üçün 3, Serxio Aquero (41 qol) ilə tarixi yarışda öndə olmaq üçün isə 9 qol lazımdır.
Argentina millisinin növbəti görüşü gələn həftə Ekvadorla olacaq və Martinez uğurlu seriyasını davam etdirmək niyyətindədir.
