BAKI, AzerVoice

ABŞ BMT Təhlükəsizlik Şurasında Qəzzada dərhal, şərtsiz və daimi atəşkəs tələb edən qətnamə layihəsini veto edib. Qətnamə eyni zamanda İsraildən humanitar yardımların qarşısındakı bütün məhdudiyyətləri qaldırmağı və HƏMAS da daxil olmaqla fələstinli qrupların əlində saxlanılan girovların azad edilməsini tələb edirdi.

AzerVoice xəbər verir ki, qətnamə layihəsi Şuranın 15 üzvündən seçilmiş 10 üzv tərəfindən hazırlanmışdı və səsvermədə 14 lehinə, 1 əleyhinə nəticə əldə olunmuşdu. ABŞ-ın vetosu sənədin qəbulunu əngəllədi. Bu, Qəzza müharibəsi başlayandan bəri Vaşinqtonun altıncı veto qərarıdır.

ABŞ-ın diplomatı Morqan Ortaqus səsvermədən əvvəl açıqlamasında bildirdi ki, layihə HƏMAS-ı qınamır, İsrailin özünü müdafiə haqqını tanımır və təşkilata yanlış legitimlik qazandırır. Onun sözlərinə görə, layihənin mətnində Vaşinqtonun xəbərdarlıqları nəzərə alınmayıb və “veto istifadəsini təşviq etmək üçün nümayiş xarakterli addım atılıb”.

HƏMAS isə ABŞ-ın mövqeyini “açıq-aşkar əlbirlik və soyqırımda şəriklik” adlandıraraq kəskin reaksiya verib.

Müşahidəçilər bu vetonun ABŞ və İsrailin beynəlxalq aləmdə getdikcə daha çox təcrid olunmasına səbəb olduğunu bildirirlər.

Xatırladaq ki, Qəzza müharibəsi 7 oktyabr 2023-cü ildə HƏMAS-ın İsrailin cənubuna hücumu ilə başlayıb. Həmin hücumda 1219 nəfər həlak olub, 251 nəfər girov götürülüb, onların 49-u hələ də Qəzzada saxlanılır.

İsrailin cavab hücumları nəticəsində Qəzzada indiyədək 65 mindən çox fələstinli, əksəriyyəti mülki şəxs, həyatını itirib. Bu rəqəmlər HƏMAS-ın idarə etdiyi Qəzza Səhiyyə Nazirliyi tərəfindən açıqlanıb və BMT tərəfindən etibarlı hesab edilir.