BAKI, AzerVoice, Fərid Mikayılov

2026-cı ildə Avstriyanın paytaxtı Vyanada keçiriləcək Eurovision Mahnı Müsabiqəsi ətrafında ciddi siyasi gərginlik yaranıb.

AzerVoice xəbər verir ki, İrlandiya və İspaniya, İsrailin iştirak edəcəyi təqdirdə yarışmanı boykot edə biləcəklərini bəyan ediblər.

İrlandiyanın ictimai yayımçısı RTE, Avropa Yayım Birliyinin (EBU) Baş Assambleyasında bəzi üzv ölkələrin İsrailin iştirakından narahatlığını dilə gətirdiyini açıqlayıb.

“İsrail iştirakını davam etdirəcəksə, İrlandiya 2026 Eurovision Mahnı Müsabiqəsində olmayacaq. Yekun qərarı EBU verdikdən sonra elan edəcəyik” — deyə bəyanatda bildirilib.

İspaniya mədəniyyət naziri Ernest Urtasun da ölkəsinin mövqeyini açıq şəkildə bildirib.

“İsrailin beynəlxalq tədbirlərdə iştirakını heç nə olmamış kimi normallaşdıra bilmərik. Müsabiqənin iştirakçıları fərdi sənətçilər deyil, dövlətin nümayəndələridir” — deyə o vurğulayıb.

Baş nazir Pedro Sançes də daha əvvəl İsrailin yarışdan kənarlaşdırılması üçün EBU-ya müraciət etmişdi. O, Rusiyanın Ukraynaya hücumundan sonra beynəlxalq tədbirlərdən uzaqlaşdırıldığını xatırladaraq, Qəzza müharibəsinə görə İsrailə də oxşar sanksiyaların tətbiq olunmasını tələb etmişdi.

Sloveniyanın ictimai yayımçısı RTVSLO da İsrailin iştirakına etiraz edib və müsabiqədən çıxmağı müzakirə etdiyini açıqlayıb. 70-dən çox keçmiş Eurovision iştirakçısı və ötən ilin qalibi, avstriyalı müğənni JJ də İsrailin 2026 yarışından uzaqlaşdırılmasını tələb edən açıq məktuba imza atıb.