BAKI, AzerVoice, Nərmin Ağayeva

İtaliyanın Genuya limanından Qlobal Sumud qrupuna qoşulan qayıqlar 300 ton humanitar yardım yükü ilə Qəzzaya doğru yola çıxıb.

AzerVoice xəbər verir ki, Qlobal Sumud qrupu çərçivəsində İtaliyanın Genuya limanından humanitar yardım daşıyan qayıqlar bu gün səhər saatlarında hazırlıqlarını tamamlayaraq Qəzza zolağına doğru hərəkətə keçib. Bu qayıqlar Siciliyanın Kataniya və Augusta limanlarında digər gəmilərlə birləşərək Barselonadan yola çıxan böyük donanmaya qoşulacaq və yaxın günlərdə Qəzzaya səfərlərini davam etdirəcək.

Qlobal Sumud Flotillası 44-dən çox ölkənin dəstəyi ilə yaradılmış beynəlxalq mülki yardım missiyasıdır və məqsədi İsrailin Qəzza zolağına tətbiq etdiyi blokadanı sındırmaq, fələstinlilərlə həmrəylik nümayiş etdirmək və humanitar yardım çatdırmaqdır. İrlandiyalı aktyor Liam Cunningham verdiyi açıqlamada məqsədin yalnız yardım çatdırmaq deyil, həm də Qəzzadakı vəziyyətə diqqət çəkmək olduğunu vurğulayıb.

Xatırladaq ki, dəstək verən tanınmış simalar arasında isveçli fəal Greta Thunberg, ispan aktyoru Eduardo Fernandez, keçmiş Barselona meri Ada Colau və irlandiyalı aktyor Liam Cunningham kimi şəxslər var. “Il Post” xəbər saytına görə, Genuyadan yola düşən bəzi gəmilər təxribatların qarşısını almaq üçün yola çıxana qədər gizli saxlanılıb.

Qeyd edək ki, Qlobal Sumud qrupu 2007-ci ildən bəri İsrailin Qəzza zolağına tətbiq etdiyi sərt blokada şəraitində humanitar fəlakətlə üzləşən fələstinlilərə dəstək məqsədi ilə təşkil olunub və bu missiya ərəbcə “sarsılmaz qətiyyət” mənasını verən “Sumud” anlayışını əks etdirir.