BAKI, AzerVoice, Nərmin Ağayeva

Birləşmiş Millətlər Təşkilatının Yaxın Şərqdəki Fələstinli Qaçqınlara Yardım və İşlər üzrə Agentliyi (UNRWA) İsrailin Qəzza zolağını işğal planının 1 milyona yaxın fələstinlini yenidən məcburi köçkünlük riski ilə üz-üzə qoyacağını xəbərdar edib.

AzerVoice xəbər verir ki, UNRWA-nın X platformasında yayımladığı açıqlamaya əsasən, İsrailin Qəzza şəhərini işğal etmək planı bölgədəki təxminən 1 milyon fələstinlinin izdihamlı məkanlara sığınmağa məcbur olacağı və humanitar fəlakətə səbəb olacağı bildirilib. Açıqlamada, hücumların aclığı və iztirabları daha da dərinləşdirəcəyi, Qəzzanın “təhlükəli döyüş bölgəsi” elan edilməsi ilə vəziyyətin daha da ağırlaşacağı vurğulanıb.

İsrail Təhlükəsizlik Kabinetinin avqustun 8-də Qəzza şəhərinin işğalı planını təsdiq etdiyi, Baş nazir Benyamin Netanyahunun isə bütün Qəzza zolağının işğalını hədəflədiklərini açıqladığı qeyd olunub. Plana görə, ilk mərhələdə 1 milyon fələstinli cənuba köçürüləcək, şəhər mühasirəyə alınacaq və intensiv hücumlardan sonra işğal ediləcək. İkinci mərhələdə isə Qəzzanın mərkəzindəki xarabalığa çevrilmiş qaçqın düşərgələrinin işğalı nəzərdə tutulur.

UNRWA, İsrailin hücumlarının Qəzzada aclıq və humanitar böhranı dərinləşdirəcəyini, insanların izdihamlı və qeyri-insani şəraitdə yaşamağa məcbur qalacağını bildirib. Qəzza zolağı 2005-ci ildən bəri ağır blokada altındadır və 2,3 milyon əhalisi ilə dünyanın ən sıx məskunlaşdığı bölgələrdən biridir. 1967-2005-ci illərdə İsrail tərəfindən işğal edilmiş Qəzza, hazırda yenidən işğal təhlükəsi ilə üz-üzədir.