BAKI, AzerVoice, Nərmin Ağayeva
Sudanda vəba epidemiyası genişlənir - 50 nəfər həyatını itirib.
AzerVoice xəbər verir ki, Sudan Səhiyyə Nazirliyi son bir həftədə ölkədə 2 min 627 yeni vəba hadisəsinin qeydə alındığını, bu müddətdə 50 nəfərin həyatını itirdiyini açıqlayıb.
Məlumata görə, 2024-cü ilin avqustundan bəri ölkədə ümumilikdə 99 min 756 nəfər vəbaya yoluxub, ölənlərin sayı isə 2 min 475-ə çatıb. Uzun sürən yağışlar və daşqınlar xəstəliyin yayılmasını sürətləndirib. Sudan hakimiyyəti 12 avqust 2024-cü ildə vəbanı pandemiya elan edib.
Qeyd edək ki, BMT 3,4 milyon sudanlı uşağın epidemiya riski altında olduğunu bildirir. UNICEF ötən ilin oktyabrında ölkəyə 1,4 milyon doza peyvənd göndərib. Müharibə və zəif səhiyyə sistemi epidemiyanın qarşısının alınmasını çətinləşdirir.